Փոխանակման կետի մոտ 7 մլն դրամի կողոպուտի մեջ կասկածվողներից մեկը ներկայացրել է գողացված ողջ գումարը (լուսանկարներ)

Դեկտեմբերի 20-ին, ժամը 9-ի սահմաններում, Երեւանի Բաշինջաղյան փողոցում գտնվող «Կրպակ» սուպերմարկետի տարադրամի փոխանակման կետի մոտ աշխատակցուհուց 7 մլն դրամ հափշտակոցներից մեկը ներկայացել է եւ իր հետ բերել գողացված գումարը:

Ավելի վաղ NEWS.am-ը հայտնել էր, որ դեկտեմբերի 20-ին, ժամը 9-ի սահմաններում, Երեւանի Բաշինջաղյան փողոցում գտնվող «Կրպակ» սուպերմարկետի տարադրամի փոխանակման կետի մոտ անհայտ անձը հարվածել էր աշխատակցուհու գլխին եւ ձեռքից բացահայտ հափշտակելով պարկը, որի մեջ եղել էր 7.000.000 դրամին համարժեք գումար, դիմել էր փախուստի:

Ոստիկանության քրեական հետախուզութայն գլխավոր, Երեւան քաղաքի վարչությունների եւ Մաշտոցի բաժնի ծառայողների ձեռնարկած օպերատիվ-հետախուզական համալիր միջոցառումների եւ որոնողական աշխատանքների շնորհիվ՝ նշված հանցագործությունը կատարելու կասկածանքով դեկտեմբերի 22-ին, ժամը 6-ին, Բագրատաշենի սահմանային անցակետում հայտնաբերվել եւ բերման էր ենթարկվել 1986 թ. ծնված Ալբերտ Վանյանը:

Ձեռնարկված հետագա միջոցառումների եւ անցկացված բացատրական աշխատանքների շնորհիվ՝ դեկտեմբերի 23-ին, ժամը 19.30-ին, բաժին է ներկայացել կողոպուտը կատարած Ալբերտ Վանյանի հանցընկերը՝ 1990 թ. ծնված Ալբերտ Աղաջանյանը, ներկայացրել հափշտակված գումարը եւ տվել խոստովանական ցուցմունք:

Ալբերտ Վանյանը եւ Ալբերտ Աղաջանյանը ձերբակալված են:

Նախաքննությունը շարունակվում է: