Երեք մահը հոր ուսերին պիտի ծանրանա...

Գյուղապետ է կոչվում, համայնքի պետ: Հարթագյուղի գյուղապետը, որտեղ հարս էր գնացել երկու մանկահասակ աղջիկներին խեղդամահ արած Մարինե Հովհաննիսյանը:

Ամուսնալուծվելուց հետո երեխաներին վերցրել ու տեղափոխվել Լոռու մարզի Սարալանջ գյուղ: Լսենք, թե ինչ է ասել Tert.am-ին Հարթագյուղի գյուղապետ  Անդրանիկ Հարությունյանը. «Ամուսինն ասում էր՝ հոգեկան հիվանդ է, դա է պատճառը, որ ամուսնալուծվել են: Նաև, եթե կինը կարողանում է երեխեքին սպանել, ուրիշ ի՞նչ որակավորում կտայիք», կնոջ ամուսինը «խելոք մարդ է, անասնապահությամբ է զբաղվում»:

Մի «խելոք մարդ» ամուսինն է, մի «խելոք մարդ» էլ գյուղապետը: Խելոք մարդը հոգեկան խնդիրներ ունեցող մոր մոտ կթողնե՞ր երեխաներին... Հոգեկան հիվանդություն: Բառը իսկ հուշում է, որ նման մարդը հոգատարության , խնամքի, ուշադրության կարիք ունի: Հեշտ ձև է հա՞ ամուսինը գտել... Համ կնոջից ազատվել, համ երեխաներից: Եթե գիտեիր, որ հոգեկան հիվանդ է, ինչու՞ նախապես չես դիմել համապատասխան մարմիններին: Ինչու՞ բախտի քմահաճույքին ես թողել երեք անպաշտապն արարածների:

Հոգեկան հիվանդին ևս համարում եմ անպաշտպան անձ: Հայր կոչեցյալը անասնապահությամբ է զբաղվում, գոնե իր պահած անասուններից չսովորե՞ց, որ ձագերին հոգեկան հիվանդ մոր հետ բախտի քմահաճույքին չեն թողնում:

Թեև ոստիկնությունը նման մարդու նկատմամբ գործ չի կարող հարուցել, բայց հասարակական գավազանով պիտի այնպե՜ս դաղել այդ հայր կոչեցյալին, որ ողջ կյանքում հանգիստ չգտնի...

Հայր կոչեցյալը, իմանալով, որ կինը հոգեկան հիվանդ է, ամուսնալուծվել ու կնոջ խնամքին է թողել երեխաներին: Երեք մահը «հոր» ուսերին պիտի ծանրանա... Խղճին չեմ ասում, որովհետև նման մարդը խիղճ ունենալ չի կարող: 

Հիշեցնենք, որ երեկ Լոռու մարզի Սարալանջ գյուղում կախված է հայտնաբերվել 5 և 7 տարեկան աղջիկների մայրը, իսկ ննջասենյակում՝ անկողնու մեջ հայտնաբերվել են նրա 2 երեխաների դիերը:

Հասմիկ Բաբաջանյան

Նյութի աղբյուրը ` hraparak.am