Արշակունյաց պողոտա- Շիրակի փողոց-Արտաշատի ճանապարհի աշխատանքների պայմանագրային արժեքը 11 մլրդ դրամ է կազմում

Արշակունյաց պողոտա- Շիրակի փողոց-Արտաշատի խճուղու  ճանապարհի շինարարական աշխատանքների պայմանագրային արժեքը կազմում է շուրջ 11 մլրդ դրամ: Այս մասին հաղորդում է NEWS.am-ի թղթղակիցը։

Երևան քաղաքի գլխավոր հատակագծով նախատեսված Արշակունյաց պողոտա- Շիրակի փողոց-Արտաշատի խճուղի ճանապարհի կառուցման աշխատանքներն իրականացվել են Ասիական զարգացման բանկի աջակցությամբ և քաղաքային կայուն զարգացման ծրագրի շրջանակներում իրականացվող Երևան քաղաքի շրջանցիկ ճանապարհի կառուցման համալիր ծրագրի մաս են կազմում, որի հիմնական նպատակն է՝ քաղաքի հյուսիսային և հարավային մուտքերի միջև սահուն կապ հաստատելով, տրանսպորտային հոսքերից բեռնաթափել Երևան քաղաքի կենտրոնը:

Միջազգային չափորոշիչներին համապատասխան կառուցված ճանապարհի շինարարական աշխատանքներն իրականացվում են ընդհանուր ծրագրի 1-ին տրանշի շրջանակներում, որի նպատակը, բացի վերը նշվածից, նաև Երևան քաղաքի համար կարևոր նշանակություն ունեցող հարավային պատշաճ մուտք ապահովելն է:

Մայրաքաղաքի նորակառույց  այս ճանապարհի երկարությունը կազմում է 5 կմ, միջին լայնությունը՝ 24-28 մ: Տրանսպորտային հոսքերի անընդհատ երթևեկություն ապահովելու նպատակով կառուցվել է 270 մ երկարությամբ ուղեանց /էստակադա/՝ Արտաշատի խճուղու երկաթուղային գծանցի վրայով: Միաժամանակ Շիրակի փողոցի և Արշակունյաց պողոտայի հատման մասում կառուցվել է հողային լիցքով շրջանաձև երթևեկությամբ երկու ուղեանցերով ճանապարհ` Նորագավթի 1-ին փողոցի և դրան զուգահեռ անցնող երկաթուղային գծանցի վրա: Հիմնական ճանապարհը բաղկացած է 4 երթևեկելի գոտիներից, իսկ հարակից բնակելի տների համար կառուցվել են լրացուցիչ երթևեկելի գոտի և սպասարկման ճանապարհ: Արտաշատի խճուղու վրա կառուցվել է նաև վերգետնյա հետիոտն անցում, որն առաջին անգամ Երևան քաղաքում ապահովված է հաշմանդամների համար նախատեսված վերելակներով: Ճանապարհաշինարարական բոլոր աշխատանքներն իրականացվել են եվրոպական չափորոշիչներին համապատասխան. փոխարինվել են ճանապարհի տակ առկա բոլոր հաղորդուղիները` դրանք հնարավորինս դուրս բերելով ճանապարհի երթևեկելի մասից,  ճանապարհը լուսավորվել է LED տիպի էներգախնայող լուսատուներով, իրականացվել են հարակից տարածքների բարեկարգման և կանաչապատման աշխատանքներ:

Ճանապարհաշինարարական աշխատանքներին նախորդել են նաև իրացման լայնածավալ աշխատանքներ, որն իրականացվել է Ասիական զարգացման բանկի ընթացակարգերին համապատասխան: Արդյունքում իրացվել է թվով 217 գույքային միավոր` 6,543.0 հազ ԱՄՆ դոլար փոխհատուցմամբ:

Շինարարական աշխատանքների պայմանագրային արժեքը կազմում է շուրջ 11 մլրդ դրամ: Նախագծային աշխատանքներն ու տեխնիկական հսկողությունն իրականացնում է «Էջիս Ինթերնեյշնլ» /Ֆրանսիա/ կազմակերպությունը:

Վերոնշյալ աշխատանքների մեկնարկը տրվել է 2014 թվականի հունվարից` Արշակունյաց պողոտայի Աշխատանքի հրապարակից դեպի Շիրակի փողոց, որն այնուհետ նոր ճանապարհահատվածի և տրանսպորտային հանգույցների կառուցմամբ, ինչպես նաև  Արտաշատի խճուղու վերակառուցմամբ ապահովել է Մ-2 միջպետական ճանապարհի հետ փոխհատումը:

Ճանապարհաշինարարական խոշոր այս ծրագրի իրականացման արդյունքում կառուցված  ավտոճանապարհն ամբողջությամբ իր վրա կվերցնի հարավից դեպի մայրաքաղաք եկող և հակառակ ուղղությամբ տրանսպորտային հոսքերի ամբողջ ծանրաբեռնվածությունը, ինչն իր հերթին կնպաստի ի սկզբանե տեղային նշանակության Նորագավթի 1-ին փողոցի շահագործմանը` ըստ նշանակության:

Շահագործման հանձնված այս ճանապարհը Երևանի շրջանցիկ ճանապարհի մի հատվածն է, հաջորդ փուլով՝ Ծրագրի 2-րդ տրանշի իրականացման արդյունքում, մայրաքաղաքի հյուսիսային և հարավային մուտքերը կկապվեն իրար: