Տոներին ընդառաջ՝ զգալի թանկացել է հատկապես խոզի միսը

Տոներին ընդառաջ՝ պարենամթերքի շուկայում պատկերը նախորդ տարիների համեմատ անփոփոխ է մնացել: Աննշան էժանացել են միայն վերամշակում անցած, դրսից ներկրված հայտնի բրենդների որոշ ապրանքատեսակներ, ինչպես օրինակ՝ բնական հյութերը, խմիչքներն ու պահածոները: Սրան զուգահեռ մարքեթինգին դիմանալու համար գներն իջեցնում են նաեւ նույնօրինակ ապրանքներ արտադրող տեղական ընկերությունները: Armtimes.com-ի թղթակցի հետ զրույցում այս մասին ասաց «Իրազեկ եւ պաշտպանված սպառող» հասարակական կազմակերպության նախագահ Բաբկեն Պիպոյանը:

Ինչ վերաբերում է այն սննդատեսակներին, որոնց ոլորտում խոշոր ներմուծող, միջազգային խոշոր զեղչերը Հայաստան բերող չկա,  համապատասխանաբար ոչ գնաճ, ոչ էլ գնանկում է նկատվում: «Այդ ապրանքատեսակների պարագայում գնաճը տարվա կտրվածքով հասել է իր պիկին, հետեւաբար Նոր տարուն առանձնակի թանկացումներ չեն նկատվում: Գյուղմթերքի մասին խոսելիս չպետք է մոռանալ, որ թանկացումներն այստեղ եղել են կլոր տարին: Երբ պետությունը նախարարի մակարդակով հայտարարում է, որ գների կարգավորում պետք չէ, ասելիք այլեւս չի մնում: Աշխարհում չկա մի երկիր, որը գյուղատնտեսություն է զարգացնում՝ առանց գների կարգավորման մեխանիզմների»,- նկատեց Բաբկեն Պիպոյանը:

Անդրադառնալով մսամթերքի շուկայում առկա գներին՝ «Իրազեկ եւ պաշտպանված սպառող» հասարակական կազմակերպության նախագահը նկատեց՝ զգալի թանկացել է հատկապես խոզի միսը: Խոսքը գլխավորապես վերաբերում է ազդրամսին՝ խոզի բդին, որը տարվա ընթացքում համեմատաբար էժան է եղել, իսկ Նոր տարվա նախաշեմին զգալի թանկացել է: Դրան հակառակ էժանացել է կողամիսը՝ ժողովրդական լեզվով ասած՝ չալաղաջն ու մատերը:

Ինչ վերաբերում է ընդեղենի գներին, ապա Բաբկեն Պիպոյանը հիշեցրեց. եթե նախանցած տարի ընկույզի 1 կիլոգրամն արժեր 12 հազար դրամ, ապա անցած տարի՝ 4 հազար: Այս տարի գերիշխող է 1 կիլոգրամի դիմաց 6 հազար դրամ գինը:

«Իրազեկ եւ պաշտպանված սպառող» հասարակական կազմակերպությունը նախաամանորյա ուսումնասիրություններ է կատարել նաեւ ոչ պարենային շուկայում: Ուսումնասիրությունների արդյունքները վկայում են` գների էական փոփոխություն է նկատվել հատկապես դեկորատիվ ապրանքների շուկայում: Արհեստական տոնածառների շուկայում գնանկում է արձանագրվել: Ամանորի գեղեցկուհու գները տատանվում են 25-200 հազար դրամի սահմաններում: