Հայտնի է հոսանքի նոր սակագինը

Հանձնաժողովի աշխատակազմն ավարտել է հաշվարկները

Գազի սակագները նվազեցնելու վերաբերյալ որոշման ընդունումից հետո Հանրային ծառայությունները կարգավորող հանձնաժողովը պատրաստվում է հաստատել նաեւ էլեկտրաէներգիայի նոր սակագները։ Հանձնաժողովի աշխատակազմն արդեն ավարտել է վերահաշվարկը։ 
Դեկտեմբերի 14¬ին նախատեսվում է այն ներկայացնել հանրային քննարկման։ Սպասվում է, որ դրանից հետո մինչեւ ամսվա վերջ հանձնաժողովը կհաստատի նոր սակագները, որոնք գործողության մեջ կմտնեն փետրվարի 1¬ից։ 
Ինչպես հայտնի է, այն բանից հետո, երբ «Գազպրոմ Արմենիան» դիմեց գազի սակագները վերանայելու առաջարկությամբ, հանձնաժողովը սեփական նախաձեռնությամբ սկսեց նաեւ էլեկտրաէներգիայի սակագները վերահաշվարկելու գործընթացը։ Դրա համար հիմք հանդիսացան սակագների վրա ազդող մի շարք գործոններ։ Մասնավորապես.
¬2017թ. փետրվարի 1¬ից մինչեւ 2018թ. փետրվարի 1¬ն ընկած ժամանակահատվածի համար կանխատեսվող էլեկտրաէներգիայի արտադրության, ներկրման եւ արտահանման հաշվեկշիռը, ջերմային կայաններին վաճառվող բնական գազի սակագնի փոփոխությունը եւ էլեկտրաէներգետիկական համակարգում գործող ընկերությունների ֆինանսատնտեսական գործունեության վրա ազդող մի շարք այլ գործոնների փոփոխությունները։
Ըստ այդմ, Հանրային ծառայությունները կարգավորող հանձնաժողովի աշխատակազմն իրականացրել է էլեկտրաէներգետիկական համակարգի խոշոր արտադրող կայանների, էլեկտրաէներգետիկական շուկայի ծառայություններ մատուցողների եւ «Հայաստանի էլեկտրական ցանցեր» ՓԲԸ¬ի սակագների վերաբերյալ հաշվարկներ։ 
Հանձնաժողովի աշխատակազմը հանգել է եզրակացության, որ նշված գործոնների ազդեցությամբ պայմանավորված՝ սպառողներին վաճառվող էլեկտրաէներգիայի սակագինը կարող է նվազել միջին հաշվով 1,42 դրամով։ Իհարկե, ի տարբերություն նախորդ փոփոխությունների, այն սպառողների վրա տարբեր կերպ կարտահայտվի։ 
Մասնավորապես առանձնացվել է սպառողների նոր խումբ։ 
Ինչպես հայտնի է, դեռեւս երկու ամիս առաջ կառավարությունը առաջարկությամբ դիմեց հանձնաժողովին՝ սակագները սահմանելու ժամանակ առանձնահատուկ ուշադրություն դարձնել սոցիալական խմբերին։ Հաշվի առնելով այդ հանգամանքը՝ սոցիալապես անապահով ընտանիքների համար սահմանվել են էլեկտրաէներգիայի առանձին սակագներ։ Ամենամեծ նվազեցումը տեղի է ունեցել այս խմբի դեպքում։ 
Հանձնաժողովի աշխատակազմի ներկայացրած որոշման նախագծով, սոցիալապես անապահով ընտանիքների համար էլեկտրաէներգիայի սակագինն իջեցվել է 6,2 դրամով։ Պահպանվել են ինչպես գիշերային, այնպես էլ ցերեկային սակագները։ 
Ըստ այդմ, գործող 46,2 դրամի փոխարեն սոցիալական այս խմբի համար առաջարկվում է 40 դրամ ցերեկային եւ 30 դրամ՝ գիշերային սակագին։ Մի դեպքում էժանացումը կազմում է 13,4, մյուս դեպքում՝ 17,1 տոկոս։ 
Ի տարբերություն անապահով ընտանիքների, մյուս բոլոր սպառողների, այդ թվում՝ բնակչության համար էլեկտրաէներգիայի սակագնի նվազեցումն անհամեմատ փոքր կլինի՝ 1,22 դրամ։ 
Այլ կերպ ասած, սոցիալապես անապահով ընտանիքներին առանձնացնելուց հետո հանձնաժողովի աշխատակազմն առաջարկում է հաջորդ տարվա փետրվարի 1¬ից գործող 46,2 դրամի փոխարեն բնակչության համար սահմանել ցերեկային 44,98 եւ գործող 36,2 դրամի փոխարեն՝ գիշերային 34,98 դրամ սակագին։ 
Սակագների վրա ազդող գործոնները, ըստ հանձնաժողովի աշխատակազմի, եղել են ինչպես դրական, այնպես էլ բացասական։ Դրական ազդեցություն է ունեցել մասնավորապես ջերմային կայաններում արտադրվող էլեկտրաէներգիայի ինքնարժեքի նվազեցումը։

Հեղինակ՝ Ն. Սարգսյան

Հոդվածն ամբողջությամբ կարդացեք «Հայոց Աշխարհ» օրաթերթի Դեկտեմբերի 13-ի համարում