Օձի խայթոցից մահացած 54-ամյա կնոջ հաազատները բողոք են ներկայացրել դատախազություն

Արարատի մարզի Սուրենավան գյուղում գյուրզա տեսակի օձի խայթոցից մահացած 54-ամյա Կարինե Հարությունյանի դեպքով հարուցված քրեական գործի կարճվելու վերաբերյալ որոշումը տուժող կողմը բողոքարկել է: Այս մասին NEWS.am-ի հետ զրույցում ասաց գործով տուժողի իրավահաջորդի ներկայացուցիչ Տաթեւիկ Սիրադեղյանը:

«Մենք բողոք ենք ներկայացրել դատախազություն, այժմ սպասում ենք»,- ասաց փաստաբանը:

Այս գործով նշանակված հանձնաժողովային դատաբժշկական փորձաքննության եզրակացության համաձայն՝ բժշկական որեւէ սխալ, անփութություն չի հայտնաբերվել: Տուժողի իրավահաջորդը կրկնակի հանձնաժողովային դատաբժշկական փորձաքննություն նշանակելու մասին միջնորդություն էր ներկայացրել, որը մերժվել էր: Տաթեւիկ Սիրադեղյանը դիմել էր դատախազություն, որտեղից էլ պատասխան էր ստացել, թե սույն քրգործը կարճվել է:

Ավելի վաղ NEWS.am-ը հայտնել էր, որ Արարատի մարզի Սուրենավան գյուղում 2015 թվականի օգոստոսի 17-ին Սուրենավանի բնակչուհի 54-ամյա Կարինե Հարությունյանին օձ է խայթել, երբ նա աշխատելիս է եղել տնամերձ հողամասում։ Նրան տեղափոխել են Արարատի հիվանդանոց, այնուհետեւ՝ Երեւան, որտեղ էլ կինը 2 օր անց մահացել է: Կարինե Հարությունյանի հարազատները պնդում են, որ «Արարատ» բժշկական կենտրոնի աշխատակիցները պատշաճ բուժօգնություն չեն ցուցաբերել կնոջը:

«Արարատ» ԲԿ-ի տնօրեն Արայիկ Սարդարյանը մեզ հետ զրույցում հայտնել էր, որ Կարինե Հարությունյանին անհրաժեշտ բոլոր ներարկումներն արվել են, սակայն կնոջ վիճակը կտրուկ վատացել է, եւ նրան տեղափոխել են Երեւան:

54-ամյա կնոջ մահվան դեպքի առիթով քրեական գործ էր հարուցվել՝ բժշկական օգնություն եւ սպասարկում իրականացնողների կողմից մասնագիտական պարտականությունները չկատարելու կամ ոչ պատշաճ կատարելու հատկանիշներով (ՀՀ Քրեական օրենսգրքի 130 հոդվածի 2-րդ մաս):