ՄԻՊ ներկայացուցիչներն այցելել են «Փոքր Մհեր» կրթահամալիր

«Փոքր Մհեր» կրթահամալիրում ստեղծված իրավիճակն ուսումնասիրելու համար ՄԻՊ ներկայացուցիչները այցելել են կրթահամալիր: Այս մասին NEWS.am-ը տեղեկանում է ՄԻՊ աշխատակազմի տարածած հաղորդագրությունից:

Նոյեմբերի 28-ին տեղեկատվության հրապարակային աղբյուրներում տեղեկություններ են տարածվել այն մասին, որ «Փոքր Մհեր» կրթահամալիր պետական ոչ առեւտրային կազմակերպության տնօրենը պարբերաբար սպառնալիքներ եւ անպարկեշտ արտահայտություններ է հնչեցրել կրթահամալիրի սաների հասցեին՝ նվաստացնելով նրանց արժանապատվությունը:

Երեխաների իրավունքների պաշտպանության եւ նրանց շահերի ապահովման նպատակով Մարդու իրավունքների պաշտպանի որոշմամբ սկսվել է սեփական նախաձեռնությամբ քննարկման ընթացակարգ ու իրականացվել է անհապաղ այց «Փոքր Մհեր» կրթահամալիր:

 Նշենք, որ ավելի վաղ կրթահամալիրի տնօրենը մեզ հետ զրույցում հաստատել էր, որ երեխաների շրջանում դժգոհություն կա:

«Երեխաներն ինչ-որ բան են ուզում ասել, հիմա մենք արտահերթ ծնողական ժողով ենք հրավիրել, որ քննարկենք: Փորձում ենք օրենքի յուրաքանչյուր կետ կիրառել, երեխաները երեւի թե մինչեւ այդ ազատ են եղել, իրանց համար անհասկանալի է: Երեխա են, չեն պատկերացնում… երեխաներն ուզում են, որ իրենց ծնողները գան, մենք էլ հրավիրել ենք արտահերթ ծնողական ժողով»,- NEWS.am-ի թղթակցի հետ զրույցում կրթահամալիրում տիրող իրավիճակն այսպես էր պարզաբանել նորանշաակ տնօրեն Վահագն Յաղմուրյանը: