Օձիքով դեմքը ծածկած էր. կուրսանտի սպանության գործով վկան սպանության գիշերը ճիչ է լսել

Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով դատական նիստին այսօր՝ նոյեմբերի 28-ին, ցուցմունք տվեց հարուցված գործի շրջանակում վկա ճանաչված Վազգեն Սարգսյանի անվան ռազմական ինստիտուտի կուրսանտ Ավետիս Նահապետյանը: Նա նշեց, որ կուրսանտի սպանության օրն առավոտյան 6:30 է  արթնացել, ոչ մի արտառոց բան չի նկատել:

«Շարվեցինք, տեսանք, որ մեզանից մեկը պակաս է: Ինստիտուտի պատասխանատուն եկավ, հերթապահի հետ բարձրացավ վերեւ: Հետո գոռոցներ լսեցինք, բարձրացանք, բայց ես մոտիկ չգնացի: Հետո ռազմական ոստիկանությունը եկավ, գումարտակը շարվեց, տարբեր հարցեր տվեցին մեզ: Հետո որ պարզվեց սպանություն է տեղի ունեցել, ոչ մեկի հետ չեմ շփվել, որ ինձ էլ չներքաշեն»-ասաց նա:

Նա նշեց, որ սպանության նախորդ օրը օրապահ է եղել, ժամը տասներկուսին քնել է, սակայն, գիշերը չորսին արթնացել է եւ տեսել, որ ամեն ինչ նորմալ է եւ կրկին քնել է. «Ժամը երեքի սահմանում գոռոց եմ լսել, կամ էլ ծիծաղ էր, հերթապահին հարցրել եմ`ինչ ձայն ա, ասել են` ամեն ինչ նորմալ ա, կրկին քնել եմ: Մինչեւ քնելս, երբ կանգնած էի երկրորդ հարկի աստիճաններին նկատեցի զինվորական համազգեստով մուշտակը բարձրացրած, օձիքով դեմքը ծածկած, գլխարկ դրած մեկին, միայն աչքերի մասն էր երեւում, մինչեւ ֆռռացինք, վազելով գնաց: Այդ տարածքը պետք է, որ օրապահն արդեն մաքրած լիներ, բայց զարմանալի էր, որ էլի մաքրում էր, բացի այդ որ նկատեցի իրեն, տարօրինակ երկար նայեց ինձ: Հերթապահին հարցրի` ով էր, ասաց` չգիտի»:

Դատարանը, սակայն, վկայի նախաքննական ցուցմունքում եւ դատաքննության ընթացքում տված ցուցմունքներում էական հակասությւոններ տեսավ եւ հրապարակեց նախաքննության ընթացքում տված վկայի ցուցմունքը, որի ժամանակ վկան ասել է, որ օձիքով դեմքը ծածկած երիտասարդը, որը աստիճաններն է մաքրելիս եղել, Մովսես Ազարյանն է եղել. «Նրա հայացքը, միջին հասակը, քայլելու ձեւը նման էր Մովսես Ազարյանին: Զինվորական շագանակագույն շապիկով մաքրում էր աստիճանը: Իմ պատկերացմամբ ժամը վեցի սահմանում լսեցի ձայն, բացեցի աչքերս տեսա մեկին, իմ հիշելով Վաչեն էր, եթե քնաթաթախ չլինեի` ավելի լավ կհիշեի: Հիշում եմ նրա վախեցած հայացքը, մի պահ ինձ նայելուց հետո` բարձրացավ մարտկոց»:

Հայկազ Բարսեղյանի սպանության համար մեղադրվում են նրա համակուրսեցիները` կուրսանտներ Գնել Թեւոսյանը, Նորիկ Սահակյանը, Վաչե Սահակյանը եւ Մովսես Ազարյանը։ Ըստ մեղադրանքի՝ նրանք հունվարի 29-ին՝ ժամը 02:00-ից 03:00-ի սահմանում, զորամասի ննջարանում դաժանությամբ սպանել են կուրսանտ Հայկազ Բարսեղյանին, ապա հետքերը թաքցնելու նպատակով կախել նրա մարմինը մարզահրապարակում գտնվող պտտաձողից, նրա անունից գրություն թողել, թե իբր ինքնասպան է եղել: Ամբաստանյալներն իրենց մեղավոր չեն ճանաչում: