Հաքերների պատճառով Սան Ֆրացիսկոյի հանրային տրանսպորտը հանգստյան օրերին անվճար է դարձել

Սան Ֆրանցիսկոյի հանրային տրանսպորտի տոմսերի վաճառքի ավտոմատացված համակարգը ուրբաթ օրը կիբեռհարձակման է ենթարկվել հաքերների կողմից, ինչի արդյունքում շաբաթ օրը քաղաքի բոլոր բնակիչները անվճար երթեւեկել են ավտոբուսներով եւ տրոլեյբուսներով, գրում է The Verge-ը:

Կիրակի օրը խնդիրը լուծվել է:

Muni ընկերության ավտոմատները (San Francisco Municipal Railway) ամբողջ օրը արտածել են «Չի աշխատում» եւ «Անվճար Muni» հաղորդագրությունները, իսկ ընկերության աշխատակիցների համակարգիչների վրա հայտնվել է «Դուք հարձակման եք ենթարկվել, բոլոր տվյալները ծածկագրված են: Բանալին ձեռք բերելու համար կապվեք [email protected], ID:681 հասցեով» հաղորդագրությունը:

Այս հարձակումը փրկագնի պահանջով դասական վնասակար վիրուսի օրինակ է, որը ծածկագրում է համակարգի կամ սարքի բոլոր տվյալները: Այսպիսի դեպքերում կիբեռհանցագործներն առաջարկում են կապվել տվյալ էլ. հասցեով՝ բանալու դիմաց փրկագնի հարցերը կարգավորելու համար:

Սան Ֆրանցիսկոյի հանրային տրանսպորտի համակարգի վրա հարձակում գործած ծրագրային ապահովումը ամբողջությամբ ավտոմատ է եղել եւ վնասել է քաղաքային տրանսպորտային գործակալության համակարգը, քանի որ այն խոցելի էր:

Պատմության մեջ ամենահզոր DDoS հարձակումը տեղի է ունեցել այս տարվա աշնանը. այդ ժամանակ հաքերները նույնպես օգտագործել էին ավտոմատացված ծրագրային ապահովում: Ծրագիրը փնտրել եւ գտել էր այն IoT սարքերը, որոնց տերերը չէին փոխել գործարանային լոգիններն ու ծածկագրերը: Հարձակման արդյունքում կիբեռհանցագործներին հաջողվել էր ձեռք բերել հասանելիություն 1.5 մլն խելացի սարքերին:

Դեպքից հետո  Google, Intel, Microsoft ընկերությունները մշակել են IoT սարքերի համար իրենց սեփական անվտանգության պահանջների ցուցակը: