Վաշխառուական գործունեությունից տուժածները պահանջում են

Երեկ կառավարության շենքի մոտ բողոքի ցույց էին կազմակերպել վաշխառությունից և խարդախությունից տուժած մի խումբ քաղաքացիներ: Տիգրան Մարտիրոսյանի վաշխառուական գործունեությունից տուժած Հայկուշ Հովակիմյանը «Փաստի» հետ զրույցում նշեց, որ վարչապետից մի պահանջ ունի՝ իր երկրում ապահովված ապրելու երաշխիքը վերականգնվի: Վերջինս պատմում է, որ իր ամուսնու ընկերոջ՝ ոստիկանության աշխատակից Ռաֆիկ Վարդանյանին օգնելու, վերջինիս շենքը աճուրդից հանելու համար, իրենք Տիգրան Մարտիրոսյանից իրենց բնակարանի գրավադրմամբ գումար են վերցրել՝ ամսական 5% տոկոսադրույքով:

 

«Իմ ընտանիքը էսօր գտնվում ա շատ ծանր կացության մեջ. 6 երեխա և 8 թոռ, և ապրելու տեղ չունենք: Մենք գումարը չենք վերցրել, տոկոսով գումարը վերցրել ա ոստիկանության աշխատողը, աղջիկս ստորագրել է նոտարում, բնակարանը գրավադրել ենք, որպեսզի ամուսնուս ընկերը իր շենքը կարողանա փրկել: Մենք ուղղակի ուզեցել ենք օգնել, գումարն իրենք են վերցրել, բայց պարզվել ա, որ գրավի փոխարեն առքուվաճառք ա ձևակերպվել»,– պատմեց նա:

Նաիրիտցիները պահանջում են

 

Երեկ կառավարության շենքի դիմաց կրկին հավաքվել էին «Նաիրիտ» գործարանի նախկին աշխատակիցները՝ գործարանը վերագործարկելու պահանջով: «Նաիրիտի» նախկին աշխատակից Արայիկ Կարայանը լրագրողների հետ զրույցում նշեց. «Մեզ պատճառաբանում էին, որ ներդրողներ չկան, բայց այսօր արդեն կա ներդրող: Ֆինանսների նախարարը հայտարարեց, թե 2017 թ. Հայաստանի բյուջեում նախատեսված գումար չկա և իրենք հնարավորություն չունեն վերագործարկելու: Բայց, ախր հոլդինգի ներդրման դեպքում Հայաստանի բյուջեն չի տալու ոչ մի կոպեկ: Իսկ իրենց թույլտվությամբ «Ռենովիլ» ընկերությունը տեր դառավ գործարանին և երկրի վրա դրեց շուրջ 400 միլիոն դոլարի պարտք: Էդ մասին լռում են, իսկ երբ հոլդինգը պատրաստ է իրա գրպանից իրա անձնական գումարները ներդնելու, նրա առաջ առանց ամաչելու պայմաններ են դնում»,– նշեց բողոքի ակցիայի մասնակիցը:

 

Մեկ այլ նաիրիտցի էլ ասաց. «Երկու տարի պայքարելուց հետո ես եկա այն համոզման, որ «Նաիրիտը» իրենց պետք չի: Կոշիկ ա պետք` ես գնամ բերեմ, կաուչուկ ու կաշի ա պետք` ես գնամ բերեմ, բայց «Նաիրիտը» չաշխատի: Մենք թալանենք, մենք հարստանանք, բայց ժողովուրդը չաշխատի: Եթե բոլորը գնան ինչ-որ սիթիներ բացեն, իրանց առևտուրը ո՞վ պիտի անի, եթե բանվորը փող չունի»: