Սարի Թաղում անչափահասին սպանելու, և 2 անչափահասի վիրավորելու գործը դատարանում է. մեղադրվում են 2 եղբայրներ

Սարի Թաղում գործող թիվ 47 դպրոցի մոտ անչափահաս Ա.Բաղդասարյանին սպանության գործով նախաքննություն ավարտվել է: Սպանության մեջ մեղադրվում են երկու եղբայրներ:

Դատական տեղեկատվական համակարգի տեղեկացմամբ՝ Նարեկ Պետրոսյանին մեղադրանք է առաջադրվել այն բանի համար, որ նա 2016թ. մարտի 13-ին` ժամը 21-ի սահմաններում, Երևան քաղաքի Սարի թաղի 5-րդ փողոցի 67 հասցեում գործող թիվ 47 դպրոցի մոտ վիճաբանության, ապա ծեծկռտուքի ժամանակ իր հետ նախապես վերցված «Թիթեռ» տեսակի դանակով կյանքից ապօրինի զրկելու դիտավորությամբ հարվածել է անչափահաս Ա.Բաղդասարյանի սրտին, ինչի հետևանքով կարճ ժամանակ անց վերջինս մահացել է:

Բացի այդ իր եղբոր` Դավիթ Պետրոսյանի հետ հիշյալ վիճաբանության ժամանակ Նարեկ Պետրոսյանը նույն դանակով, իսկ Դավիթ Պետրոսյանն իր ծալովի դանակով դիտավորությամբ հարվածներ են հասցրել անչափահաս Ս.Օսիպովին` նրա առողջությանը պատճառել միջին ծանրության վնաս` առողջության տևական քայքայումով:

Դավիթ Պետրոսյանին մեղադրանք է առաջադրվել այն բանի համար, որ նա 2016թ. մարտի 13-ին` ժամը 21-ի սահմաններում Երևան քաղաքի Սարի Թաղի 5-րդ փողոցի 67 հասցեում գործող թիվ 47 դպրոցի մոտ վիճաբանության, ապա ծեծկռտուքի ժամանակ իր հետ նախապես վերցված ծալովի դանակով դիտավորությամբ հարվածել է անչափահաս Ռ. Կարապետյանի կրծքավանդակին` պատճառելով նրա կյանքին վտանգ սպառնացող առողջության ծանր վնաս: Բացի այդ Դավիթ Պետրոսյանը նույն դանակով, իսկ Նարեկ Պետրոսյանը նախապես վերցված «Թիթեռ» տեսակի դանակով դիտավորությամբ հարվածներ են հասցրել անչափահաս Ս. Օսիպովին` նրա առողջությանը պատճառել միջին ծանրության վնաս` առողջության տևական քայքայումով:

Դավիթ Պետրոսյանի ու Նարեկ Պետրոսյանի նկատմամբ խափանման միջոց է ընտրվել կալանավորումը: Դատական գործը կքննվի Էրեբունի և Նուբարաշեն վարչական շրջանների ընդհանուր իրավասության դատարանում դատավոր Աննա Դանիբեկյանի նախագահությամբ: