Դիլիջանում մեկնարկել է 4-րդ ամենամյա Բիզնես ինովացիոն ֆորումը

Դիլիջանում մեկնարկել է 4-րդ ամենամյա Բիզնես ինովացիոն ֆորումը, որն անց է կացվում «Հայաստան 20.18 - 2018թ.՝ Հայաստանը 20 ամենանորարար երկրների շարքում» խորագրի ներքո:

ԻՏՁՄ փոխտնօրեն Հայկ Չոբանյանի խոսքով Հայաստանն այսօր աշխարհի ինովացիոն երկրների վարկանիշում 60-րդն է: «Պետք է այնպես անել, որ 2018-ին Հայաստանը տեղ գտնի ամենանորարար երկրների լավագույն 20-ում»,- ասել է նա:

ԻՏՁՄ նախագահ Ալեքսանդր Եսայանի խոսքով՝ Բիզնես ինովացիոն ֆորումը կարեւոր հարթակ է, որտեղ քննարկվում են կատարված այն աշխատանքները, որոնք իրականացվում են Հայաստանում եւ արտերկրում: «Այսօր ավանդական բիզնեսն էլ է ենթարկվում փոփոխությունների, փոփոխվում են բիզնես մոդելները: Այնպես որ նորարարությունների կարիքը բիզնեսում ակնհայտ է: Իսկ Հայաստանի պես փակ սահմաններով երկիրը պետք է օգտագործի տեխնոլոգիաները եւ կարճ ժամանակահատվածում հասնի նկատելի արդյունքների»,- ասել է նա:

ՀՀ տրանսպորտի, կապի եւ ՏՏ նախարարի տեղակալ Գագիկ Թադեւոսյանը ներկայացրել է ՀՀ վարչապետ Կարեն Կարապետյանի ողջույնի խոսքը, նշելով, որ միջոցառումը կարեւոր նշանակություն ունի ինովացիոն ոլորտի շահառուների համախմբման, առկա հիմնախնդիրների համատեղ քննարկման եւ համագործակցության ձեւաչափերի մշակման համար: Ազգային ինովացիոն համակարգի զարգացումը հանդիսանում է ՀՀ կառավարության գերակայություններից մեկը: Այս ուղղությամբ, կառավարության կողմից մասնավոր հատվածի հետ համատեղ իրականացվող բազմաթիվ ծրագրերն ուղղված են Հայաստանում միջազգային լավագույն չափանիշներին համապատասխանող արդիական ինովացիոն ենթակառուցվածքների ստեղծմանն ու զարգացմանը, նորարարական գաղափարները խթանող ֆինանսական ենթակառուցվածքների ներդրմանը:

Ինովացիոն ֆորումի նպատակն է Հայաստանի ինովացիոն ռազմավարության հիմնական առաջնահերթությունների սահմանումն ու լուծումների ձեւակերպումը:  Ինովացիոն ֆորումի շրջանակում ՀՀ կառավարության ներկայացուցիչների, տեղական եւ միջազգային փորձագետների քննարկումների միջոցով կներկայացվի ինովացիոն զարգացման առաջավոր փորձը, կծավալվի գործնական քննարկում եւ կձեւավորվի օրակարգ՝ 2018 թվականին Հայաստանը աշխարհի 20 ամենանորարար երկրների շարքում դիրքավորելու համար:

Բիզնես ինովացիոն ֆորումին մասնակցում են տեխնոլոգիական, կրթական եւ ձեռներեցության ոլորտների, ինչպես նաեւ ՀՀ կառավարության եւ միջազգային կազմակերպությունների շուրջ 150 ներկայացուցիչներ, այդ թվում` միջազգային բանախոսներ 6 երկրներից (ԱՄՆ, Ռուսաստան, Թայվան, Բուլղարիա, Իսրայել, Վրաստան):

Երկօրյա ինովացիոն ֆորումին աջակցություն է ցուցաբերվել «ԵՄ-ն բիզնեսի համար» եւ «ԵՄ-ն նորարարության համար» նախաձեռնությունների շրջանակում: