Նախարարությունն առաջարկում է մեքենաների տեխնիկական զննությունն անցկացնել առանց կտրոնների

ՀՀ տրանսպորտի, կապի եւ տեղեկատվական տեխնոլոգիաների նախարարությունն առաջարկում է մեքենաների տեխնիկական զննությունն անցկացնել առանց կտրոնների:

Այս առնչությամբ նախարարության տարածած հաղորդագրության մեջ ասվում է.

«ՀՀ տրանսպորտի, կապի եւ տեղեկատվական տեխնոլոգիաների նախարարի հրամանով  տրանսպորտի բնագավառում իրականացվող օրենսդրական բարեփոխումների շրջանակում մշակվող օրենսդրական ակտերի, նախագծերի վերաբերյալ հասարակական կազմակերպությունների եւ մասնավոր հատվածի դիրքորոշումն ստանալու, քննարկելու եւ դրանք նախարարին ներկայացնելու նպատակով ստեղծված աշխատանքային խումբը գումարել է առաջին նիստը։

Տրանսպորտային միջոցների տեխնիկական  զննության իրականացման կարգի նախագծի շուրջ քննարկումներից հետո աշխատանքային խումբը նախարարին է ներկայացրել երեք կետից կազմված հետեւյալ եզրակացությունը.

1)Տրանսպորտային միջոցների տեխնիկական զննումն իրականացնել առանց տեխնիկական զննման կտրոնների տրամադրման:

2)Տեխնիկական զննության հաշվառումը իրականացնել  միասնական էլեկտրոնային բազայի միջոցով, որտեղ կարտացոլվեն տեխնիկական զննում անցած բոլոր տրանսպորտային միջոցները եւ հավաքագրված տեղեկատվությունը տրամադրել ՀՀ ճանապարհային ոստիկանությանը՝ էլեկտրոնային եղանակով:

3)Սահմանել վարչական պատասխանատվություն ձեւական տեխնիկական զննություն իրականացնող կազմակերպությունների նկատմամբ:

Մարդատար - տաքսի ավտոմոբիլներով ուղեւորափոխադրումներ իրականացնելու լիցենզավորման կարգի նախագծի վերաբերյալ քննարկումն աշխատանքային խումբը որոշել է տեղափոխել հաջորդ նիստին` հաշվի առնելով, որ ՀԿ-ների եւ մասնավոր հատվածի կողմից առաջարկվում են ոլորտը կարգավորելու նոր պայմաններ եւ պահանջներ: Մինչ այդ նախարարությունը կհստակեցնի իր դիրքորոշումը եւ խմբի քննարկմանը կներկայացնի ոլորտի հետագա կարգավորմանն ուղղված իր քաղաքականությունը:

Նոր պայմաններն ու պահանջները վերաբերում են ոլորտում ներգրավվող տրանսպորտային միջոցների նկատմամբ մաշվածության սահմանափակում սահմանելուն, դեղին հիմնագույնի համարանիշները վերականգնելուն, մարդատար - տաքսի ծառայությունների մատուցման ձեւից անկախ (առցանց (օնլայն) կամ դասական ձեւով) գործունեության հավասար պայմաններ սահմանելուն։