Դժվար է պնդել, որ պատկառելի գիտելիք ունենալու դեպքում անհատը կարող է դրսևորվել
ՔաղաքականությունՀՀ վարչապետ Նիկոլ Փաշինյանը չի պատկերացնում, թե ինչպես մարդը կարող է հաղթահարել աղքատությունն առանց աշխատանքի: Մյուս կողմից հասկանում է, որ աշխատանքով կարելի է հաղթահարել աղքատությունը, եթե կրթության արդունքում ձևավորվել է այնպիսի ներուժ, որի շնորհիվ մարդն աշխատելով՝ հնարավորություն կունենա դուրս գալ աղքատության ճիրաններից:
Հայաստանի անկախացումից հետո, սակայն, երբ երկրում մեկը մյուսի հետևից փակվեցին խոշոր գործարանները, գիտահետազոտական ինստիտուտները, Հայաստանի բնակչության հե՛նց կրթված ու գիտելիք ունեցող հատվածն առաջինն ընկավ հարվածի տակ: Ունենալով գիտելիք՝ ստեղծված իրավիճակը թույլ չէր տալիս պատկերացնել, թե ինֆլյացիայի, դեֆիցիտի, հոսանքի բացակայության ու այլ պարտադրված զրկանքների պայմաններում որտեղ կարող էր կրթված մարդն իր գիտելիքը ներդնել ու ապրուստի միջոց հայթայթել:
Փաստորեն, անկախությունից 29 տարի անց կրկին սկսել է պահանջարկ վայելել գիտելիքը, որը կարող է նաև բարեկեցիկ ապագայի հիմք հանդիսանալ,բայց,համաձայնեք, միայն գիտելիքով հնարավոր չէ. հարկավոր է նաև այնպիսի միջավայր ձևավորել, որ երկրի տնտեսությունը մի կողմից դառնա գիտելիքահեն, իսկ մյուս կողմից այնպիսի հարկային պայմաններ ստեղծի, որ մարդն իր սեփական աշխատանքով կարողանա ոչ միայն սեփական ապրուստը վաստակել, այլև շահույթ ստանալ, հարստանալ ու հարստացնել երկիրը: Ու քանի դեռ չկա այն բանաձևը, թե առանց նախանական կապիտալի ինչպես կարելի է սեփական բիզնեսը հիմնել ու առաջ շարժվել, անցած տարիներին ձևավորված վայրի կապիտալիզմի կամ ,եթե կուզեք, ֆեոդալիզմի ներկայիս պայմաններում. բոլոր ցանկությունները կշարունակեն մնալ թղթի վրա կամ մարդկանց գլխում: Եվ այս պայմաններում դժվար է պնդել, որ անգամ՝պատկառելի գիտելիք ունենալու դեպքում անհատը կարող է դրսևորվել, ճեղքել ապակե պատնեշներն ու դուրս գալ ստեղծված իրավիճակից:
Ամալյա Բայրամյան
Pressmedia.am