Այսօր Հայաստանի հայրաքաղաքի՝ Գյումրիի օրն է

ՀՀ Շիրակի մարզպետ Տիգրան Պետրոսյանը շնորհավորական ուղերձ է հղել Գյումրու օրվա առթիվ: «Սիրելի՛ գյումրեցիներ   Սրտանց շնորհավորում եմ բոլորիս մեր սիրելի քաղաքի՝ Գյումրու օրվա առթիվ։ Գյումրին այն եզակի քաղաքներից է, որ կարողանում է և՛ կոփել, և՛ ուժ տալ, նա կարողանում է վշտի միջից ծիծաղել և ծիծաղով դաս տալ, սովորեցնում է սիրել և ներել, սպասել և հավատալ։   Կյանքի ու փորձության խաչմերուկում Գյումրուն և գյումրեցուն բաժին հասավ կյանքը՝ լի գոյապայքարով և մարտահրավերներով, սակայն այդ ամենը գյումրեցուն միայն դարձրեց ավելի կուռ ու տոկուն։   Գյումրեցին, նրա խոսքը, հումորը, ավանդույթներն ու պատմությունն այսօր դարձել են Գյումրու այցեքարտը։ Եվ մենք պետք է անենք հնարավորինը, որ մեր քաղաքն օր օրի դառնա ավելի գրավիչ ու գերող։   Մեր հին, բայց տակավին երիտասա՛րդ Գյումրի, թող ճակատագրի բոլոր խաչմերուկներում միշտ ընտրես արարելու և ապրելու ուղին, թող անցյալի վիշտն ու ցավը ամոքվեն դրական փոփոխությունների նոր ծիլերով։ Մեր սե՛ր Գյումրի, քանի դու կաս, քեզ սիրողի պակաս չի լինի։   Շնորհավոր տոնդ, Գյումրի՛ քաղաք,   Շնորհավոր տոնդ, գյումրեցի՛»,- գրել է մարզպետը: