Արարատ Միրզոյանը Հրայր Թովմասյանի նկատմամբ հարուցված քրեական գործը քաղաքական հետապնդում չի համարում
ՔաղաքականությունՀՀ Ազգային ժողովի նախագահ Արարատ Միրզոյանը Սահմանադրական դատարանի նախագահ Հրայր Թովմասյանի նկատմամբ հարուցված քրեական գործը քաղաքական հետապնդում չի համարում:
«Արմենպրես»-ի փոխանցմամբ` այս մասին Միրզոյանն ասաց հունվարի 13-ին լրագրողների հետ զրույցում:
«Հրայր Թովմասյանի կամ որևէ այլ անձի երբևէ կատարած առերևույթ կամ իրեն մեղսագրվող հանցագործությունը, օրենքի խախտումը կապ չունի այս պահին կամ երբևէ ունեցած պաշտոնի հետ: Քաղաքական հետապնդումների վերաբերյալ խոսք լինել չի կարող»,- ասաց Միրզոյանը:
Անդրադառնալով այն հարցին, թե արդյոք ՍԴ շուրջ ճգնաժամը դեռ շարունակվո՞ւմ է, Միրզոյանը նշեց՝ այո:
«Իհարկե: Հանգուցալուծում չի ստացել, ես բազմիցս առիթ ունեցել եմ այդ մասին խոսելու»,- նշեց նա:
Հատուկ քննչական ծառայությունը Սահմանադրական դատարանի նախագահ Հրայր Թովմասյանին մեղադրանք է առաջադրել Քրեական օրենսգրքի 308-րդ հոդվածի երկրորդ մասի հատկանիշներով՝ պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ: Թովմասյանի նկատմամբ խափանման միջոց է ընտրվել ստորագրությունը չհեռանալու մասին։
2019թ. դեկտեմբերի 11-ին ՀՀ Ազգային ժողովում երկրորդ ընթերցմամբ և ամբողջությամբ ընդունվեց Սահմանադրական դատարանի դատավորների վաղ կենսաթոշակային համակարգի ներդրման օրենքի նախագիծը: ՀՀ կառավարության հեղինակած «Սահմանադրական դատարանի մասին» սահմանադրական օրենքում լրացում կատարելու մասին» և կից օրենքների նախագծերի փաթեթով նախատեսվում է, որ, եթե Սահմանադրական դատարանի դատավորները, այդ թվում նախագահ Հրայր Թովմասյանը, մինչև 2020 թվականի հունվարի 31-ը հրաժարական տան, ապա մինչև իրենց պաշտոնավարման ժամկետի լրանալը կստանան իրենց աշխատավարձի չափով կենսաթոշակ:
1
2
3
4
5
1
2
4
5
3
4
