Ինքնաբացարկի միջնորդություն՝ Արամ Հարությունյանի գործով բողոքը քննող նոր դատավորին

Բնապահպանության նախկին նախարար Արամ Հարությունյանի փաստաբան Կարեն Հակոբյանը քիչ առաջ ինքնաբացարկի միջնորդություն ներկայացրեց Արամ Հարությունյանի գործը վերաբացելու դեմ ներկայացված բողոքի քննող դատավոր Նելլի Բաղդասարյանին։

Ինքնաբացարկի հիմքն ըստ փաստաբանի այն է, որ դատավորի ամուսինը՝ ավագ դատախազ Արիս Բարսեղյանը այս գործով մեղադրող դատախազ Հայկ Պետրոսյանի հետ աշխատում է Գլխավոր դատախազության հատկապես կարևոր գործերով քննության վարչությունում։ Այս հանգամանքն, ըստ փաստաբանի կասկած է հարուցում, որ դատավորը կարող է անաչառ քննել գործը։

Մեղադրող դատախազ Հայկ Պետրոսյանը, սակայն նշեց, որ այդ հանագամանքը չի կարող կաշկանդող լինել կամ ազդել բողոքի քննության վրա։

Դատարանը լսելով կողմերի դիրքորոշումները հեռացավ միջնորդության վերաբերյալ որոշում կայացնելու։

Նշենք, որ բողոքը քննող դատավոր Դավիթ Գրիգորյանը հունիսի 4–ին ինքնաբացարկ էր հայտնել:

Մասնավորապես՝ դատավորը կասկածներ է ունեցել, որ այն հանգամանքը, թե ինքը քննել է նաեւ ՀՀ երկրորդ նախագահ Ռոբերտ Քոչարյանի գործը, կարող է խոչընդոտ հանդիսանալ գործի հետագա անկողմնակալ քննության համար: Ըստ դատավորի` երկու գործերով էլ կա փոխկապակցված անձ, խոսքը գործարար Սիլվա Համբարձումյանի մասին է: Նա եւ՛ Քոչարյանի, եւ՛ Հարությունյանի գործով հանդիսանում է նրանց կաշառք տված անձ:

Հիշեցնենք, որ պաշտպանական կողմը տեւական ժամանակ է դատարանից խնդրում է վերացնել Հարությունյանին եւ մյուս մեղադրյալներին առնչվող քրեական գործը վերաբացելու մասին որոշումը։

Ավելի վաղ ՀՔԾ–ն հայտնել է, որ առանձնապես խոշոր չափերով կաշառք ստանալու դեպքի առթիվ ՀՀ հատուկ քննչական ծառայությունում հարուցված քրեական գործի նախաքննությամբ ձեռք բերված բավարար ապացույցների համակցության հիման վրա Արամ Հարությունյանը որպես մեղադրյալ է ներգրավվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով եւ 190-րդ հոդվածի 3-րդ մասի 1-ին կետով նախատեսված հանրորեն վտանգավոր այն արարքների կատարման համար, որ նա, հանդիսանալով ՀՀ գործադիր իշխանության ղեկավար աշխատող, իր հետ մտերիմ հարաբերությունների մեջ գտնվող անձանց օժանդակությամբ առանձնապես խոշոր չափերով կաշառք է ստացել, ապա՝ օրինականացրել հանցավոր ճանապարհով ստացված առանձնապես խոշոր չափերով գույքը:

Նախկին նախարարն իր պաշտպանի միջոցով հայտնել էր, որ չի ընդունում առաջադրված մեղադրանքը։

Արամ Հարությունյանի նկատմամբ, որպես խափանման միջոց է ընտրվել կալանավորումը եւ նրա նկատմամբ հայտարարվել հետախուզում: