Սանասարյանը չմեկնաբանեց գլխավոր դատախազի խոսքերը. մնալու եմ օրվա խորհրդին համապատասխան կեցվածքով
ՔաղաքականությունԱյսօր ես չեմ խոսելու այդ գործից, մնալու եմ օրվա խորհրդին համապատասխան իմ կեցվածքով: Այդ մասին այսօր՝ ապրիլի 24-ին, ասաց պետական վերահսկողական ծառայության ղեկավար Դավիթ Սանասարյանը (նրա լիազորությունները ժամանակավորապես դադարեցվել են –խմբ.), չցանկանալով մեկնաբանել գլխավոր դատախազի ասածը, որ հնարավոր չէ Հայաստանում ինչ-որ մեկի վրա «գործ կարվի»:
«Այսօր ես չեմ խոսելու այդ գործից, մնալու եմ օրվա խորհրդին համապատասխան իմ կեցվածքով: Իսկ մնացածի մասին… առաջիկայում կհրավիրեմ ձեզ եւ կխոսենք այդ հարցերից»,-ասաց Սանասարյանը:
Հիշեցնենք, որ ապրիլի 18-ին Դավիթ Սանասարյանին մեղադրանք է առաջադրվել ՀՀ քրեական օրենսգրքի 308-րդ հոդվածի 1-ին մասով. այն է՝ պաշտոնեական լիազորությունները չարաշահելը:
Ըստ ԱԱԾ-ի՝ քրեական գործով բավարար ապացույցներ են ձեռք բերվել, որոնք առերևույթ վկայում են այն մասին, որ վերջինս, հանդիսանալով ՀՀ պետական վերահսկողական ծառայության ղեկավար, ունենալով ծառայության անմիջական ղեկավարումն իրականացնելու, ծառայության աշխատակիցներին նշանակելու և ազատելու, վերահսկվող օբյեկտներում ուսումնասիրություններ իրականացնելու հանձնարարագրեր տալու, վերահսկվող օբյեկտներից ծառայության գործառույթներին առնչվող տեղեկություններ և փաստաթղթեր պահանջելու լիազորություններ, խմբային շահերից ելնելով` իր աշխատակիցների կողմից փաստացի կառավարվող ընկերության ձեռնարկատիրական գործունեությանը նպաստելու նպատակով իր պաշտոնեական դիրքն առերևույթ օգտագործել է ծառայության շահերին հակառակ, ինչպես նաև չի կատարել իր ծառայողական պարտականությունները:
Դավիթ Սանասարյանի նկատմամբ որպես խափանման միջոց է կիրառվել չհեռանալու մասին ստորագրությունը:
Նախաքննության օրինականության նկատմամբ հսկողություն իրականացնող դատախազի համաձայնությամբ քննիչի կողմից միաժամանակ որոշում է կայացվել ՀՀ պետական վերահսկողական ծառայության ղեկավար Դավիթ Սանասարյանի պաշտոնավարությունը ժամանակավոր դադարեցնելու մասին։
Սանասարյանը, սակայն պնդում է, որ գործը կարված է և շինծու։
1
2
3
4
5
1
2
4
5
3
5
