«Փարիզում երբևէ այդքան մարդ չէր ձերբակալվել». Ֆրանսիայում ձերբակալվածների թիվը հասել է 1550-ի

Փարիզում «դեղին անթև բաճկոնների» շաբաթօրյա բողոքի ակցիայի մասնակիցների շրջանում ձերբակալվածների թիվը հասել է 1550-ի, այս մասին հայտնել է Ֆրանսիայի ներքին գործերի նախարար Քրիստոֆ Կաստաները՝ նշելով, որ թիվը ռեկորդային է մայրաքաղաքի համար, գրում է ТАСС գործակալութունը:

«Երբևէ Փարիզում իրավապահների կողմից այդքան մարդ չէր ձերբակալվել», - ասել է նախարարն ակցիայի ընթացքում ծառայություն իրականացրած ստորաբաժանումների ներկայացուցիչների հետ հանդիպման ժամանակ:

Ի դեպ, հանդիպումից մեկ ժամ առաջ Կաստաները հայտնել էր, որ ամբողջ երկրում ձերբակալվել է 1385 մարդ, սակայն այդ թիվը, միանշանակ, կաճի:

Նախարարը նաև ընդգծել է, որ ոստիկանությունն ու ժանդարմերիան կարողացել են բավականին հաջող գործել զրահապատ տեխնիկայի աջակցությամբ, որը «վաղուց չէր կիրառվել ֆրանսիական մայրաքաղաքում»:

Ըստ Կաստաների՝ այս անգամ իրավապահ ուժերն առավել ճկուն ու արդյունավետ ռազմավարություն են կիրառել՝ հենվելով գործողությունների նոր կանոնների վրա, ինչի արդյունքում հաջողվել է խուսափել առավել շատ տուժածներից ու նվազեցնել բռնության դեպքերը:

Այնուամենայնիվ՝ նախարարը խոստովանել է, որ դեկտեմբերի 8-ն իրենց համար «բարդ ու լարված օր էր»:
 
«Դեղին անթև բաճկոնների» բողոքի լայնամասշտաբ ակցիաները սկսվել են նոյեմբերի 17-ից: Իրավապահների հետ զանգվածային բախումներից, արցունքաբեր գազի կիրառումից, հարյուրավոր մարդկանց ձերբակալումից և վանդալիզմի համատարած դրսևորումից հետո նախագահ Էմանուել Մակրոնը համաձայնել էր զիջման գնալ ու հետաձգել բենզինի՝ հունվարի մեկից ծրագրված թանկացումը:

Սակայն նույնիսկ այս քայլը չի բավարարել «դեղին անթև բաճկոններին», որոնց միացել են նաև ուսանողները, ինչպես նաև մեծ թվով անարխիստներ՝ երկրի տարբեր հատվածներից: