Ծիծաղելի են խոսակցությունները, թե Նիկոլ Փաշինյանի նախկին համախոհները կդառնան նրա կեղծ ընդդիմությունը. «Ելք»
ՔաղաքականությունԱյն խոսակցությունները, թե վարչապետի պաշտոնակատար Նիկոլ Փաշինյանի նախկին համախոհները կդառնան նրա կեղծ ընդդիմությունը, պարզապես ծիծաղելի են: Այս մասին հոկտեմբերի 26-ին ԱԺ-ում ավանդական ճեպազրույցների ժամանակ ասաց ԱԺ «Ելք» խմբակցության քարտուղար Գեւորգ Գորգիսյանը:
Պատգամավորի կարծիքով՝ այդպիսի խոսակցությունների վրա առաջինը Փաշինյանն ինքը կծիծաղի: «Եթե նման լուրերը փորձում է տարածել Հանրապետական կուսակցությունը, ապա միայն մի բան կարող եմ ասել՝ այս բոլոր տարիներին ՀՀԿ-ն է փորձել կառավարել ընդդիմությանը, եւ հիմա գուցե իր օրինակով է չափում: Սակայն մեզ ոչ ոք չի կարողացել կառավարել եւ չի կարող»,- նշեց Գորգիսյանը:
Նա հավաստիացրեց, որ «Քաղաքացիական պայմանագրի», ինչպես եւ մյուս կուսակցությունների հետ թշնամանք կամ անբարեհաճություն չի լինի, այլ միայն կառուցողական քննարկումներ:
Գեւորգ Գորգիսյանը հիշեցրեց, որ «Ելք» դաշինքի մեջ 3 կուսակցություն է մտնում՝ Նիկոլ Փաշինյանի «Քաղաքացիական պայմանագիրը», Էդմոն Մարուքյանի նախագահությամբ «Լուսավոր Հայաստանը» եւ Արամ Սարգսյանի գլխավորած «Հանրապետությունը»: Արտահերթ խորհրդարանական ընտրություններին կուսակցություններն ինքնուրույն կգնան: «Սակայն «Լուսավոր Հայաստանը» «Հանրապետության» հետ դաշինքը կպահպանի եւ ստացած ձայների թվով խորհրդարանում երկրորդ տեղին է հավակնում»,- պարզաբանեց «Ելք» խմբակցության քարտուղարը:
Հիշեցնենք, որ Հայաստանում խորհրդարանական արտահերթ ընտրություններն անցկացվելու են դեկտեմբերին:
1
2
3
4
5
1
2
3
4
5
