Այսօրվա տոնը որեւէ մեկի «դասարանի քեֆը» չէ. Աշոտյանը՝ ՀՀԿ-ականներից ընդամենը 3 հոգու հրավիրելու մասին

Այսօրվա տոնը որեւէ մեկի սեփականությունը չէ, որեւէ մեկի «դասարանի քեֆը» չէ, որեւէ մեկի ընտանեկան ու անձնական միջոցառումը չէ։ Այս մասին Facebook-ի իր էջում գրել է ՀՀԿ խմբակցության պատգամավոր, ՀՀԿ փոխնախագահ Արմեն Աշոտյանը՝ անդրադառնալով Հանրապետության օրվա տոնակատարություններին ՀՀԿ ներկայացուցիչների հրավիրված չլինելուն:

Նա, մասնավորապես, գրել է.

«Առաջին Հանրապետության ծննդյան եւ Սարդարապատի ճակատամարտի գլխավոր խորհրդանիշներից մեկը միասնականությունն է եղել։

Այսօրվա տոնը որեւէ մեկի սեփականությունը չէ, որեւէ մեկի «դասարանի քեֆը» չէ, որեւէ մեկի ընտանեկան ու անձնական միջոցառումը չէ։

Պետության վերականգնումը խորհրդանշող օրը նաեւ պետական ինստիտուտների վերաժեւորման եւ գնահատման օր է՝ անկախ օրվա հերոսներից, գործող անձերից եւ «նոր իրողությունններից»։

Զարմանալի է, երբ իրենց ադեկվատ համարող մարդիկ փորձում են արդարացնել այսօրվա տոնակատարություններին ԱԺ-ի պատշաճ մասնակցության հարցի տապալումը։

Ու ցավոք, դրեւորված միտումնավոր մոտեցումը հակասում է թե օրվա խորհրդին, թե միասնականության, թե «սիրո եւ համերաշխության» կոչերին»:

Նշենք, որ Ազգային ժողովից տոնական միջոցառումներին հրավիրվել է 13 պատգամավոր, 4-ը՝ «Ելք» խմբակցությունից, 3-ականը՝ ՀՀԿ-ից, ՀՅԴ-ից եւ «Ծառուկյան» խմբակցությունից: ՀՀԿ-ից հրավիրվել են Արա Բաբլոյանը, Վահրամ Բաղդասարյանը եւ Ֆելիքս Ցոլակյանը:

Այս առնչությամբ, ԱԺ աշխատակազմի ղեկավարի տեղակալ Արսեն Բաբայանը պարզաբանում է տարածել, թե ինչու ԱԺ նախագահ Արա Բաբլոյանը չի մասնակցել տոնական միջոցառումներին. «Նախորդ տարիներին ՀՀ Ազգային ժողովը, որպես իշխանության ճյուղ, արարողակարգի համաձայն միջոցառմանը հրավիրված է եղել ամբողջ կազմով։ Այս տարի դրսեւորվել է այլ մոտեցում։ Որպես ԱԺ մարմինների ղեկավարներ չեն հրավիրվել հանձնաժողովների նախագահները։ Չեն հրավիրվել Ազգային ժողովի փոխնախագահները եւ չի հրավիրվել Ազգային ժողովի նախագահը։ Իսկ Արա Բաբլոյանը հրավիրվել է միայն որպես ՀՀ ԱԺ ՀՀԿ խմբակցությանը հատկացված ընդամենը երեք պատգամավորների շարքում։

Ավելին, երբ Ազգային ժողովի աշխատակազմը փորձել է ճշտել ԱԺ նախագահի մասնակցության արարողակարգը, հաշվի առնելով, որ միջոցառման պաշտոնական մասը միշտ իրականացվել է եռյակի մասնակցությամբ՝ Հանրապետության նախագահի, ԱԺ նախագահի եւ վարչապետի, ԱԺ աշխատակազմին հայտնել են, որ այս տարի Ազգային ժողովի նախագահը չի լինելու նշված եռյակում։ Այսպիսով ՀՀ Ազգային ժողովի նախագահ Արա Բաբլոյանը գտնում է, որ իշխանության առանձին ճյուղի, օրենսդրի նկատմամբ դրսեւորվել է ոչ համարժեք վերաբերմունք»,- հայտարարել է նա։

«Դրսեւորվել է ոչ համարժեք վերաբերմունք». Ինչո՞ւ Արա Բաբլոյանը ներկա չէր Սարդարապատի միջոցառումներին