Արաբկիրում 28-ամյա երիտասարդը «սեռական կարիքները հոգալու համար» կանանց ներկայությամբ զբաղվել է ձեռնաշարժությամբ

Երևանի ընդհանուր իրավասության դատարանում Արթուր Մկրտչյանի նախագահությամբ ավարտվել է Տիգրան Ա.-ի գործի դատական քննությունը: 28-ամյա Տիգրանին մեղադրանք էր առաջադրվել 3 դրվագ խուլիգանության համար՝ ՀՀ քրեական օրենսգրքի 258 հոդվածի 1-ին մասով:

Ըստ մեղադրանքի՝ 2017 թվականի նոյեմբերի 3-ին, ժամը 21-ն անց 50-ի սահմաններում Մամիկոնյանց փողոցի շենքերից մեկի առաջին հարկում Տիգրան Ա.-ն Դոնարա Ե.-ի (անունը փոխված է) ներկայությամբ առնանդամը տաբատից հանելով՝ կատարել է ձեռնաշարժություն: Նույն գործողությունը, ըստ մեղադրանքի, Տիգրան Ա.-ն 2017 թվականի նոյեմբերի 6-ի առավոտյան՝ ժամը 8-ն անց 30-ի սահմաններում, կատարել է Հրաչյա Քոչար փողոցի շենքերից մեկի առաջին հարկում Էռնա Մ.-ի ներկայությամբ, ինչպես նաև՝ 2017 թվականի նոյեմբերի 13-ի առավոտյան՝ 8-ն անց 30-ի սահմաններում, նույն բանը կատարել է նույն շենքում՝ նույն կնոջ ներկայությամբ: Տիգրան Ա.-ն իրեն լիովին մեղավոր է ճանաչել, զղջացել է, խնդրել է մեղմ վարվել իր նկատմամբ:

Դատարանում Տիգրան Ա.-ն հայտնել է, որ 2016 թվականի ամռանը մեկնել է ՌԴ՝ արտագնա աշխատանքի: Հայաստան է վերադարձել 2017 թվականի սեպտեմբերի 27-ին: Դրանից հետո՝ մինչև նոյեմբերի վերջերը, պարբերաբար՝ շուրջ 10 անգամ, եղել են դեպքեր, որ փողոցով քայլելիս տեսել է որևէ կնոջ, որն իրեն դուր է եկել: Քանի որ ինքը չի իմացել՝ինչպես կարելի է քաղաքավարի կերպով մոտենալ կնոջը, ուստի իր սեռական կարիքները հոգալու համար հետևել է այդ կնոջը, քայլել է այնքան, մինչև կինը մտնի որևէ շենքի շքամուտք: Այնտեղ ինքը կանգնել է որոշ հեռավորության վրա, նայել է կնոջ դեմքին, իջեցրել է տաբատն ու վարտիքը, կնոջ աչքի առաջ զբաղվել է ձեռնաշարժությամբ:

Քանի որ կանանց ընտրել է «պատահականության սկզբունքով», չի հիշում նրանց բնակության ստույգ վայրերը բայց բոլոր դեպքերն էլ Արաբկիրի շենքերում են եղել: Ինքը որևէ աղջկա չի սպառնացել, որևէ բան չի պահանջել: Եղել են դեպքեր, որ աղջիկները բղավել են, իսկ ինքը վախեցել ու փախել է…

Տուժող Դոնարա Ե.-ն հայտնել է, որ 2017 թվականի նոյեմբերի 3-ին, ժամը 21-ն անց 50-ի սահմաններում ինքը հասել է իրենց շենքին ու նկատել է, որ մի երիտասարդ հետևում է իրեն: Արագացրել է քայլերը, մտել է շքամուտք, մոտեցել է վերելակին, սեղմել է կանչի կոճակը: Անծանոթ երիտասարդն իր կողքով անցել, բարձրացել է աստիճաններով, կանգնել է առաջին և երկրորդ հարկերի միջնամասում: Ինքը հասկացել է, որ մի բան այն չէ: Երիտասարդը շրջվել է դեպի իրեն, դանդաղ մոտեցել է: Ինքը նկատել է, որ նրա տաբատի շղթան արձակված է, սեռական օրգանը հագուստից դուրս է, նա զբաղվել է ձեռնաշարժությամբ: Ինքը բղավել է, ասել է, որ ոստիկանություն է զանգում:

Երիտասարդը դուրս է եկել շքամուտքից ու փախել է: Այդ պահին բացվել են վերելակի դռները, ինքը տուն է գնացել: 2017 թվականի դեկտեմբերի 1-ին համացանցում նկատել է ոստիկանության տեսանյութը, ճանաչել է իրեն հետապնդած երիտասարդին, ինչից հետո դիմել է ոստիկանություն: Տուժող Էռնա Մ.-ն հայտնել է, որ 2017 թվականի նոյեմբերի 1-ին, ժամը 23-ի սահմաններում դուրս է եկել տանից, ցանկացել է աստիճաններով իջնել:

Առաջին և երկրորդ հարկի աստիճանահարթակին կանգնած էր մի անծանոթ երիտասարդ՝ 25-30 տարեկան: Նա ուշադիր նայում էր իրեն: Ինքն ուշադրություն չի դարձրել, այդ երիտասարդը արտասովոր ոչինչ չէր անում: Նոյեմբերի 6-ի առավոտյան՝ 8-ն անց 30-ի սահմաններում, տանից դուրս է եկել, որ գնա աշխատանքի: Նորից առաջին և երկրորդ հարկերի միջև եղած աստիճանահարթակին տեսել է նույն երիտասարդին, ով տաբատն իջեցրել էր, իրեն նայելով՝ ձեռնաշարժությամբ է զբաղվել: Ինքն անմիջապես առանց ձայն հանելու բարձրացել է տուն: Մի քանի րոպե անց նորից դուրս է եկել, շքամուտքում արդեն հիշյալ երիտասարդին չի տեսել: Նոյեմբերի 13-ին, ժամը 8-ն անց 30-ի սահմաններում տանից դուրս է եկել աշխատանքի գնալու, շքամուտքի նույն հատվածում տեսել է նույն երիտասարդին: Նա դարձյալ ուշադիր իրեն էր նայում ու ձեռնաշարժությամբ էր զբաղվում: Ինքը բղավել է, նա վախեցել ու փախել է:

Այդ երիտասարդին հետագայում տեսել է համացանցում տեղադրված տեսանյութում ու դիմել է ոստիկանություն: Դատարանը Տիգրան Ա.-ին մեղավոր է ճանաչել երեք դրվագ խուլիգանության համար՝ ՀՀ քրեական օրենսգրքի 258 հոդվածի 1-ին մասով, և վերջին հաշվով դատապարտել է 90 հազար դրամ տուգանքի: