Արմավիրում 49–ամյա կնոջ մահվան պատճառը բութ առարկայով պարանոցի սեղմումն է եղել. մանրամասներ

ՀՀ քննչական կոմիտեի Արմավիրի մարզային քննչական վարչությունում միջոցներ են ձեռնարկվում՝ Արմավիր քաղաքի բնակչուհու մահվան հանգամանքները պարզելու ուղղությամբ:

ՀՀ Քննչական կոմիտեից NEWS.am-ին հայտնում են , որ մարտի 6-ին ՝ ժամը 21:00-ին , Արմավիրի շտապ օգնության կայանից ահազանգ է ստացվել առ այն , որ Արմավիր քաղաքի բնակարաններից մեկում բնակիչ է հանկարծամահ եղել։ Նախնական տվյալներով՝ ընտանիքի անդամների հայտարարության համաձայն՝ 2018թ. մարտի 6-ին՝ ժամը 20:00-ի սահմաններում, Արմավիր քաղաքի բնակչուհին՝ ծնված 1969թ.(վերջինս հոգեկան առողջության հետ կապված խնդիրներ ուներ), իրենց տան խոհանոցում, վերցնելով հում մսի կտոր, փորձել է  այն կուլ տալ։ Մայրը, նկատելով, որ նա խեղդվում է, փորձել է օգնություն ցուցաբերել եւ սեղմել է պարանոցը՝ մսի կտորը կոկորդից հանելու համար ։

Արմավիրի 48-ամյա բնակչուհու մահվան մասին բժշկական վկայականի համաձայն՝ վերջինիս մահվան հիմնական պատճառ է հանդիսացել բութ առարկաներով պարանոցի օրգանների սեղմումը :

Դեպքի առթիվ 2018թ. մարտի 14-ին հարուցվել է քրեական գործ՝ ՀՀ քրեական օրենսգրքի 109-րդ հոդվածի 1-ին մասով, որի նախաքննությունն իրականացվում է  ՀՀ ՔԿ Արմավիրի մարզային քննչական վարչությունում :

Ձեռնարկվում են անհրաժեշտ քննչական եւ դատավարական այլ գործողություններ՝ 48-ամյա կնոջ մահվան հանգամանքները պարզելու, դեպքի բազմակողմանի, լրիվ եւ օբյեկտիվ քննությունն ապահովելու ուղղությամբ :