Հայաստանն աշխարհի հետ իր հարաբերությունները կառուցել է շահերի հատման, և ոչ թե բախման սկզբունքով. Կարեն Բեքարյան
Քաղաքականություն
ԱԺ պատգամավոր, ԱԺ Արտաքին հարաբերությունների մշտական հանձնաժողովի անդամ Կարեն Բեքարյանը գտնում է, որ Ռուսաստան-ԱՄՆ հարաբերությունների լարվածությունը չի կարող իր հետքը չթողնել ընդհանրապես տարածաշրջանի և, մասնավորապես, փոքր երկրների վրա:
«Աշխարհը դառնում է անհանգիստ, երբ երկու գերտերություններ մտնում են այդպիսի խորը հակասությունների կամ ճգնաժամի մեջ: Աշխարհում չեք գտնի որևէ երկիր, որ այդ ամենից չանհանգստանա»,- Tert.am-ի հետ զրույցում ասաց պատգամավորը և նշեց, որ բաժանարար գծերի ավելի հստակեցման խնդիր է առաջանում:
Ինչ վերաբերում է այդ ամենի՝ Հայաստանի վրա ազդեցությանը՝ Բեքարյանն ասաց. «Փորձը ցույց է տվել, որ առ այսօր ինչ տիպի էլ եղել են հակասությունները, դրանք չեն անդրադարձել ղարաբաղյան կարգավորման գործընթացի վրա` համանախագահների համատեղ աշխատանքի առումով: Առաջին հերթին հույս ունենանք, որ այս սրացման ալիքն էլ իր անդրադարձը չի ունենա: Եթե համանախագահության մեջ եղավ սրացում, հակասություններ` հենց բանակցային ձևաչափի մեջ, դա ոչ մի լավ բանի չի կարող բերել կոնֆլիկտի կարգավորման գործընթացին»:
Պատգամավորը նշեց, որ ընդհանրապես տարածաշրջանը «եփում» է և ոչ միայն Ռուսաստան-ԱՄՆ հարաբերությունների սրման պատճառով:
Նա նկատեց, որ անմիջական հարևանությամբ՝ Թուրքիայում, լարվածության օջախ կա, ինչպես նաև սրվում են ԱՄՆ-Իրան հարաբերությունները, և բարդ է ասել, թե ինչ առումով և ինչպես այդ ամենը կանդրադառնա Հայաստանի վրա:
«Սա իր ածանցյալ անդրադարձերն է ունենում ողջ տարածաշրջանի վրա և լարվածության էլեմենտներ է պարունակում: Հայաստանի Հանրապետությունն իր հարաբերություններն աշխարհի հետ կառուցել է շահերի հատման, և ոչ թե բախման սկզբունքով, և երբ շահերի հատման սկզբունքով ես կառուցում քաղաքականությունը, ինչն ընդունվում է գործընկերների կողմից, ապա երբևէ չի կարող շահավետ լինել իրենց միջև լարումը»,-ասաց նա:
Կարեն Բեքարյանը նկատեց, որ Հայաստանն ունի դրական զարգացող հարաբերություններ կողմերից յուրաքանչյուրի հետ` ԱՄՆ-ի, Իրանի, ինչպես նաև Ռուսաստանի ռազմավարական գործընկերն է: Հետևաբար, այս ամենը Հայաստանի համար չի կարող լինել դրական և մենք լարվածության թուլացման առաջին շահագրգռված երկրներից ենք:
Դիտարկմանը, թե հնարավո՞ր է, որ Արևմուտքի հետ Հայաստանի հարաբերությունները տուժեն՝ հաշվի առնելով Ռուսաստանի շահերը, Կարեն Բեքարյանը պատասխանեց, որ ուղղակիորեն ոչ, իսկ անուղղակի դրսևորումներ կարող են լինել և բերել ինչ-ինչ հետևանքների: Նա օրինակ բերեց, որ տնտեսական առումով պատժամիջոցների քաղաքականությունը ածանցյալ ձևով չի կարող չանդրադառնալ մեզ վրա: «Ես հույս ունեմ, որ ողջամտությունը հաղթելու է և ինչ-որ եզրեր կգտնվեն, որոնց վրա կկառուցվեն կամուրջներ, որովհետև չեմ կարծում, որ կողմերից որևէ մեկը չի գիտակցում, որ սա որևէ լավ բանի չի բերելու»,-ասաց նա:
Ինչ վերաբերում է Հայաստանի դիրքորոշմանը, պատգամավորն ասաց, որ որտեղ ուժերը հերիքեն, հնարավորությունները թույլ տան, Հայաստանը բոլոր հնարավոր եղանակներով պետք է նպաստի այդ լարվածության թուլացմանը: Բեքարյանը միաժամանակ նկատեց, որ նման խնդիրների համար Հայաստանը փոքր երկիր է:
1
2
3
4
5
1
2
3
4
5
