Իմ մեքենայի մոտ կանգնած եմ եղել, ոստիկանական մեքենայի ապակու կոտրվելը նույնիսկ չեմ տեսել. Անի Զախարյանը ցուցմունք տվեց

Անցած տարվա հուլիսի 19-ին ոստիկանության մեքենայի ապակին կոտրելու հրահանգներ տալու մեջ մեղադրվող՝ Հայաստանի «Նոր քաղաքական մշակույթ» կուսակցության նախագահ Անի Զախարյանն այսօր՝ մայիսի 22-ին, դատարանում հայտարարեց, որ իրեն մեղավոր չի ճանաչում:

Երեւանի Կենտրոն եւ Նորք-Մարաշ վարչական շրջանի դատարանում Անի Զախարյանը պատմեց, որ դեպքի օրը ժամը 19:00-ի սահմաններում գնացել է Խորենացի փողոց, որտեղ հանդիպել է ցուցարարներին, որոնք խնդրել են իրեն ելույթով հանդես գալ:

«Ես եկել եմ տուն, վերցրել բարձրախոսս ու մեքենայով գնացել այնտեղ: Բարձրախոսով ես ընդամենը մեկ անգամ ելույթ եմ ունեցել, ասել եմ, որ պետք է գործենք Սահմանադրությանը համաձայն, չպետք է թույլ տանք արյունահեղություն: Շատ լավ ճանաչելով «Նախախորհրդարանին» եւ «Հիմնադիր խորհրդարանին»՝ ես քաղաքական հոտառությամբ զգում էի, որ ինչ-որ բան կարող է լինել, դրա համար եմ նման կոչ արել: Այնուհետեւ հեռացել եմ եւ կանգնել իմ մեքենայի կողքին՝ բարձրախոսս ուսիս գցած, իսկ խոսափողն ինքնաբերաբար բերանիս մոտ պահած»,- ասաց Անի Զախարյանը:

Ամբաստանյալը նշեց, որ երբ ինքն իր մեքենայի մոտ կանգնած է եղել, տեսել է, որ ոստիկանական մեքենա է մոտենում հավաքված ժողովրդին, ապա քիչ անց հեռանում: Թե ինչու էր այդ մեքենան հեռացել, Անի Զախարյանի խոսքով, իր համար էլ էր զարմանալի:

«Ես չհասկացա ոչինչ... հետո 1,5-2 ամիս անց ինձ զանգում է քննիչն ու ասում, որ ես այդ օրը հրահանգ եմ տվել, որ մեքենայի ապակին կոտրեն, բայց ես նույնիսկ չեմ իմացել, որ այդ օրը մեքենայի ապակի է կոտրվել: Մի՞թե այդքան անխոհեմ պետք է լինեի, որ նման կոչ անեի»,- ասաց նա:

Անի Զախարյանը ցուցմունքի վերջում կարծիք հայտնեց, որ այս ամենի հետեւում հնարավոր է՝ կանգնած լինի ՀՀ ոստիկանապետ Վլադիմիր Գասպարյանը, որի գործունեությունն ինքը միշտ քննադատել է:

Ըստ մեղադրական եզրակացության` Անի Զախարյանը հուլիսի 19-ին ժամը 20-ի սահմաններում Երեւանի Խորենացի եւ Քրիստափոր խաչմերուկում ինքնաբուխ հանրահավաքի ընթացքում բարձրախոսով հնչեցրել է կոչեր եւ դրդել մի խումբ ինքնությունները չպարզված անձանց կոտրել եւ վնասել այդ պահին հիշյալ խաչմերուկում իր ծառայողական պարտքը կատարող ոստիկանության մեքենան, որի մեջ եղել են ոստիկանության ծառայողներ:

Անի Զախարյանին մեղադրանք է առաջադրվել Քրեական օրենսգրքի 38-185-րդ հոդվածի 2-րդ մասի 3-րդ կետով, այն է` ուրիշի գույքը դիտավորությամբ ոչնչացնելուն կամ վնասելուն դրդելը, որը կատարվել է՝ կապված անձի կամ նրա մերձավորի կողմից իր ծառայողական կամ հասարակական պարտքը կատարելու հետ: Խափանման միջոց է ընտրվել ստորագրություն չհեռանալու մասին: