Դուք պետական կառավարման նոր կարգի կայացման առաջին քայլը կատարողներն եք. Սերժ Սարգսյանը՝ ԱԺ նիստում (Ֆոտո)

Դուք պետական կառավարման նոր կարգի կայացման ուղղությամբ առաջին եւ գլխավոր քայլը կատարողներն եք: Այս մասին, այսօր՝ մայիսի 18-ին, Հայաստանի 6-րդ գումարման Ազգային ժողովի առաջին նիստում իր ելույթում հայտարարել է ՀՀ նախագահ Սերժ Սարգսյանը :

Հանրապետության նախագահը նախ  շնորհավորեց բոլոր անցած ուժերին՝ Ազատ թափանցիկ ընտրությունների միջոցով ՀՀ գալիք հինգ տարիների համար քաղաքական պատասխանատվության բաժին ստանձնելու համար, ապա ասաց.

«Շնորհավորում եմ բոլոր պատգամավորներին եւ մաղթում բեղմնավոր աշխատանք:

2 տարի առաջ ես հավատում էի, որ մենք մտբնելու ենք բեկումնային մի ժամանակաշրջան, որը լինելու է խոստումնալից, բայց պատասխանատու: Այսօր եկել է այդ օրը եւ շնորհավորում եմ մեզ: Պատգամավորներին շնորհավորում եմ կրկնակի, որովհետեւ դուք եք պետական կառավարման նոր կարգի կայացման ուղղությամբ առաջին եւ գլխավոր քայլը կատարողները: Բոլորս գիտակցում ենք, որ շատ գործ ունենք անելու, բայց ունենք ամուր կամք, մեծ լավատեսություն եւ տարիների մնայուն փորձ մեր սկսած գործը հաջողությամբ պսակելու համար:

Անշուշտ, խորհրդարանի առաջնային գործառույթը օրենքներ ստեղծելն է, որոնք կլինեն ոչ միայն իրավական, այլեւ ընկալելի եւ գործուն: Երբերմն ասում են՝ ավելի լավ է ունենալ թերի օրենք, քան ընդհանրապես չունենալ, սա ինձ համար անընդունելի է, լրջագույն այս փուլում չենք կարող մեզ թույլ տալ նման շռայլություն, որովհետեւ թերի կամ վատ օրենքը նաեւ վնասաբեր է:

Խորհրդարանի անելիքը օրինաստեղծ գործունեությամբ չի սահմանափակվում, խորհրդարանական կառավարման համակարգի անցումը ենթադրում է խորհրդարանի դերի էական բարձրացում նաեւ արտաքին քաղաքականության հարցերում, առաջնային կարեւորություն է ձեռք բերում խորհրդարանական դիվանագիտության արդյունավետության բարձրացմանն ուղղված սկզբունքների ներդրումը, ինչպես նաեւ կոնկրետ քայլերի եւ գործողությունների կատարումը:

Միջազգային խորհրդարանական կազմակերպությունները լավագույն հարթակներից են հայկական դիրքորոշումը ներկայացնելու համար: Այս հարթակներում անհրաժեշտ է ակտիվ քաղաքականություն վարել, որ նվազեցնենք Ադրբեջանի կողմից հակահայկական բանաձեւերի եւ նախագծերի թիվը, փոխարենն առաջ տանելով ճշմարտությունը:

Խորհրդարանական դիվանագիտական արդյունավետության բարձրացման համար նպատակահարմար է վերակազմակերպել այն՝ հիմքում դնելով հետեւյալ սկզբունքները՝ մասնակցություն, նախաձեռնողականություն, գործընկերային կապեր, մշտական աշխատանք, անձնական պատասխանատվություն, հետեւողականություն: Սա աշխատանքի տարողունակ ոլորտ է, որի մասին խոսելու մանրամասն հնարավորություն կունենանք»: