Այս ընտրություններում հաշմանդամություն ունեցող անձանց ընտրական իրավունքի իրացման հարցում հետընթաց է եղել. Զարուհի Բաթոյան (տեսանյութ)
ՔաղաքականությունՄենք այս ընտրություններում հաշմանդամություն ունեցող անձանց ընտրական իրավունքի իրացման հարցում ոչ թե առաջընթաց ենք գրանցել, այլ հակառակը: Այս մասին Tert.am-ի հետ զրույցում ասաց հաշմանդամություն ունեցող անձանց հարցերով փորձագետ, «Ելք» դաշինքից ռեյտինգային ընտրակարգով առաջադրված Զարուհի Բաթոյանը: Վերջնիս նշում է, որ ապրիլի 2-ին հաշմանդամություն ունեցող մարդիկ տարբեր խնդիրների առաջ են կանգնել՝ թե՛ ֆիզիկական, թե՛ տեխնիկական առումներով. «ԿԸՀ որոշումը, որը իբրև պետք է նպաստեր հաշմանդամություն ունեցող անձանց ընտրելու իրավունքին, շատ խտրական էր, և հարմարությունները, մատչելիության պայմանները պարտադիր պահանջ չեն ընտրատեղամասերի համար»,- ասաց Բաթոյանը:
-Հաշմանդամություն ունեցող անձիք նշում էին, որ ապրիլի 2-ին կայացած ընտրություններին համապատասխան պայմաններ չէին ստեղծվել ընտրություններին մասնակցելու համար: Դուք ի՞նչ դիտարկումներ ունեք այս խնդրի հետ կապված։
-Մենք ընտրությունների առաջ էլ բարձրաձայնել ենք այդ խնդիրների մասին: Տարբեր տեսանկյուններից խնդիրներ կային, նախ՝ Կենտրոնական ընտրական հանձնաժողովի որոշումը, որը իբրև պետք է նպաստեր հաշմանդամություն ունեցող անձանց ընտրելու իրավունքին: Պետք է ասեմ, որ այդ որոշումը շատ խտրական է, և այստեղ հարմարությունները, մատչելիության պայմանները պարտադիր պահանջ չեն ընտրատեղամասերի համար: Այս որոշման մեջ նշվում է՝ հնարավորության դեպքում ապահովել այս կամ այն պայմանը: Հնարավորության դեպքում ապահովել, օրինակ՝ թեքահարթակներով, քվեարկությունը կազմակերպել առաջին հարկում, տրամադրել խոշորացույցներ և այլն: Այսինքն՝ սա պարտադրող փաստաթուղթ չէր, որն ի սկզբանե խնդրահարույց էր: Սա խտրական մոտեցում է հաշմանդամություն ունեցող անձանց ընտրելու իրավունքին:
Բացի այդ, որևէ մեկի համար նորություն չէ, որ Հայաստանի քաղաքները, գյուղերը, բոլոր վայրերը անմատչելի են հաշմանդամություն ունեցող անձանց, և այն ընտրատարածքները, որտեղ պետք է մարդիկ իրականացնեն իրենց ընտրելու իրավունքը, դրանք մեր դպրոցներն են, մշակույթի օջախներն են և այլն: Այսինքն, այն բոլոր վայրերն են, որտեղ մարդիկ ֆիզիկական խոչընդոտների են բախվում: Բացի ֆիզիկական մատչելիությունից, խնդիրներ կային տեսողության խնդիր ունեցող անձանց քվեարկելու իրավունքի հետ կապված: Եթե նախկին համապետական ընտրությունների ժամանակ բրալյան կաղապարներ կային, այս դեպքում դրանք բացակայում էին: Տեսողության խնդիր ունեցող մարդը չէր կարող ինքնուրույն իրականացնել քվեարկությունը:
-Մենք այս անգամ հատուկ հետազոտություն չենք իրականացրել, որովհետև որևէ բան չի փոխվել: ԿԸՀ և մյուս բոլոր պատասխանատուների մոտեցումը հստակ արտացոլվել է իրենց որոշման մեջ: Եթե իսկապես կամք լիներ վիճակը բարելավելու, մենք նման որոշում չէին ունենա: Այս որոշումը մեկ քայլ հետ է նախորդ որոշումներից, ոչ թե առաջընթաց ենք գրանցել, այլ հակառակը:
-Հաշմանդամություն ունեցող որքա՞ն մարդ է հաշվառված Հայաստանում և նրանցից մոտ քանի տոկոսը չի կարողացել ընտրությանը մասնակցել:
-Պաշտոնական տվյալներով 200 հազարից ավելի հաշմանդամություն ունեցող մարդ կա, և, երեխաներին չհաշված. նրանց մեծ մասը ունի ընտրության իրավունք: Բայց հաշմանդամություն ունեցող անձիք տարբեր պատճառներով շատ ցածր մասնակցություն են ունեցել:
Մանրամասները՝ տեսանյութում:
1
2
3
4
5
1
2
3
4
5
