Քննարկում ՄԱԿ-ի ԱԽ-ում. ՀՀ դեսպանը ներկայացրել է Ղարաբաղի խնդրի էությունը

Սա պայքար է` հանուն ինքնապաշտպանության եւ ֆիզիկական գոյատեւման` Ադրբեջանի կողմից արձակած ագրեսիայի եւ էթնիկ զտումների պայմաններում: Այս մասին, փետրվարի 21-ին, ՄԱԿ-ի Անվտանգության խորհրդում կայացած «Միջազգային խաղաղություն եւ անվտանգության պահպանում. Հակամարտությունները Եվրոպայում» խորագրով բաց քննարկման ժամանակ իր ելույթում նշել է ՄԱԿ-ում ՀՀ մշտական ներկայացուցիչ, դեսպան Զոհրաբ Մնացականյանը:

ԱԳՆ-ից NEWS.am-ին հայտնում են, որ հանդիպմանն անդրադարձ է արվել Եվրոպայում այսպես կոչված «սառեցված» հակամարտություններին, ներառյալ Կիպրոսում, Ուկրաինայում, Մոլդովայում եւ Հարավային Կովկասում տիրող իրավիճակին, այդ թվում` ԼՂ հիմնահարցին: Ընդգծվեց հակամարտությունների խաղաղ կարգավորմանն, ինչպես նաեւ հակամարտությունների կանխարգելմանն ուղղված միջազգային ջանքերի ամրապնդման կարեւորությունը, այդ թվում` տարածաշրջանային մեխանիզմների միջոցով:

ՄԱԿ-ում ՀՀ մշտական ներկայացուցիչ, դեսպան Զոհրաբ Մնացականյանը հանդես եկավ ելույթով` ներկայացնելով Լեռնային Ղարաբաղի հակամարտության էությունը` որպես մարդու իրավունքների, ազատության եւ ինքնորոշման համար պայքար, որն առաջացել է ի պատասխան կանոնավոր բնույթ կրող խտրականությունների եւ բռնությունների: «Սա պայքար է, որն ականատես եղավ հայերի հանդեպ ջարդերին Բաքվում, Սումգաիթում, Կիրովաբադում եւ Ադրբեջանի այլ վայրերում՝ ի պատասխան Լեռնային Ղարաբաղի ժողովրդի իր ապագան ազատ որոշելու օրինական պահանջին: Սա պայքար է` հանուն ինքնապաշտպանության եւ ֆիզիկական գոյատեւման` Ադրբեջանի կողմից արձակած ագրեսիայի եւ էթնիկ զտումների պայմաններում: Սա պայքար է բարբարոս վարչակարգի դեմ, որը խելացնոր կերպով փառաբանում է 2004թ. հայ սպային կացնահարած մարդասպան Սաֆարովին: Սա պայքար է համատարած հայատյացություն եւ հայերի հանդեպ անհանդուրժողականություն քարոզող վարչակարգի կողմից իրավասության հավակնությունների դեմ: Սա կենաց-մահու եւ ազատության պայքար է», - նշել է ՄԱԿ-ում ՀՀ մշտական ներկայացուցիչը։

Անդրադառնալով 2016թ. ապրիլին Լեռնային Ղարաբաղի նկատմամբ սանձազերծած Ադրբեջանի ագրեսիային, դեսպան Մնացականյանը նշեց, որ հայկական կողմը մշտապես տեղեկացրել է Անվտանգության խորհրդին տեղի ունեցած բարբարոսությունների եւ ոճրագործությունների մասին՝ ընդգծելով, որ միջազգային հանրությունը պետք է հաստատակամորեն մերժի ուժի կիրառումը` որպես հակամարտության ռազմական լուծում: Նշվեց, որ փոխարենն անհրաժեշտ է իրական քայլեր ձեռնարկել 2016թ. Վիեննայում եւ Սանկտ Պետերբուրգում ձեռքբերված համաձայնություններն իրագործելու ուղղությամբ` խաղաղ բանակցությունների առաջընթացն ապահովելու նպատակով: Խոսքի ավարտին Զոհրաբ Մնացականյանը Հայաստանի երախտագիտությունն արտահայտեց միջազգային հանրությանը, մասնավորապես Անվտանգության խորհրդին եւ ՄԱԿ-ի Գլխավոր քարտուղարին` ԵԱՀԿ Մինսկի Խմբի համանախագահների միջնորդական ջանքերին ցուցաբերվող հետեւողական եւ անվերապահ աջակցության համար:

Նշենք, որ այս քննարկումը տեղի է ունեցել Ուկրաինայի ԱԳ նախարար Պ.Կլիմկինի նախագահությամբ, որի նպատակն էր դիտարկել Եվրոպայում առկա հակամարտությունների արդյունքում տարածաշրջանային եւ միջազգային խաղաղության եւ անվտանգության համար սպառնալիքները:

Քննարկման մասնակիցների թվում էին Հունգարիայի, Լիտվայի եւ Վրաստանի ԱԳ նախարարները, Խորվաթիայի պետքարտուղարը, Շվեդիայի, Ղազախստանի, Մոլդովայի եւ Լատվիայի ԱԳ փոխնախարարները:

Հանդիպումը մեկնարկել է մեկ րոպե լռությամբ` հարգանքի տուրք մատուցելով նախօրեին կյանքից հեռացած ՌԴ մշտական ներկայացուցիչ Վիտալի Չուրկինի հիշատակին:

Հանդիպմանը բացման ելույթներով հանդես եկան ՄԱԿ ԳՔ Ա.Գուտերեշը, ԵԱՀԿ ԳՔ Լամբերտո Զանիերը եւ ԵՄ Արտաքին հարաբերությունների ծառայության ԳՔ Հելգա Շմիդը, որոնք ընդգծեցին Եվրոպայում չկարգավորված հակամարտությունների հարցում ՄԱԿ-ի համագործակցությունը ԵԱՀԿ եւ ԵՄ՝ որպես տարածաշրջանային կառույցների հետ: Մատնանշվեց նաեւ, որ որեւէ մեկ գործոն չի կարող նշվել, որպես Եվրոպայում առկա հակամարտությունների պատճառ, իսկ որոշ դեպքերում պայմանավորվածությունները պարզապես չեն իրագործվում: