Պատգամավորները պահանջում են հետ կանչել Բելառուսում ՀՀ դեսպանին, սառեցնել անդամակցությունը ՀԱՊԿ-ին

Ազգային ժողովի պատգամավորներն այսօր` փետրվարի 8-ին, մեկնաբանել են Բելառուսի կողմից հայտնի բլոգեր Ալեքսանդր Լապշինին Ադրբեջանին արտահանձնումը:

Ըստ «Ազատ դեմոկրատներ» կուսակցության նախագահ Խաչատուր Քոքոբելյանի` Հայաստանի Ազգային ժողովը պետք է իր դիրքորոշումը հայտնի տեղի ունեցածի վերաբերյալ:

«Երեկ բոլորս տեսանք, թե ինչպես մեր բարեկամ Բելառուսը հայտնի բլոգերին անօրինական արտահանձնեց մեր հակառակորդ Ադրբեջանին: Սա մարդու ազատ խոսքի իրավունքի խախտում է, նրան մեղադրում են Արցախ այցելելու եւ իր մտքերը տեսակետները հնչեցնելու համար: Մենք չպետք է բավարարվենք այստեղ կամ այնտեղ խոսելուց, Ազգային ժողովն իր դիրքորոշումը պետք է հայտնի»,- ասաց Խաչատուր Քոքոբելյանը:

Էդուարդ Շարմազանովը` որպես հայ- բելառուսական հանձնաժողովի համանախագահ, Բելառուսի այս քայլը որակեց խայտառակ, որը չի բխում խաղաղ կարգավորման տրամաբանությունից. «Այս քայլը նաեւ Ռուսաստանի ու Հայաստանի դեմ է»:

ՀԱԿ խմբակցության պատգամավոր Նիկոլ Փաշինյանն էլ առաջարկեց այսօր ժամը 15:00-ին հավաքվել Հայաստանում Բելառուսի դեսպանատան դիմաց` կոշտ դիրքորոշումը հայտնելու համար:

«Սա իր քաղաքական նշանակությամբ հավասար է Հունգարիայի կողմից Ռամիլ Սաֆարովին արտահանձնելուն»,- ասաց Նիկոլ Փաշինյանը:

Մի քանի պատգամավորներ էլ պահանջեցին սառեցնել ՀԱՊԿ անդամակցությունը, հետ կանչել Բելառուսում Հայաստանի դեսպանին:

«Աննախադեպ լկտիություն է եւ ցինիզմ, այստեղ ամենամեծ անելիքն ունի Հայաստանի Հանրապետությունը, եթե իրեն համարում է արժանապատիվ պետություն, լավ կլինի, որ սառեցնենք մեր անդամակցությունը ՀԱՊԿ-ում, հետ կանչենք մեր դեսպանին»,- հայտարարեց Նաիրա Զոհրաբյանը:

Հրանտ Բագրատյանը նույնպես հորդորեց կոնկրետ քայլերի դիմել, ոչ թե բոցաշունչ եւ հայրենասիրական ելույթներ ունենալ: Ինչ վերաբերում է Հայաստանի խորհրդարանի քայլերին, պատգամավորներն առաջարկեցին վեց խմբակցություններով դատապարտող տեքստ պատրաստել կամ ԱԺ նախագահը հանձնարարի արտաքին հարաբերությունների հանձնաժողովին ի մի բերել բոլոր կարծիքներն ու դատապարտող հայտարարություն տարածել:

Ազգային ժողովի նախագահ Գալուստ Սահակյանը, սակայն, կարծում է` չպետք է հապշտապ որոշումներ կայացնել. «Ավելի լուրջ մտայնություններ են պետք եւ դա էդպես սովորական խնդիր չէ, եւ առաջիկայում որոշակի ուղերձներ կլինեն այդ ուղղությամբ»:

Ավելի վաղ NEWS.am-ը հայտնել էր, որ փետրվարի 7-ին Բելառուսի Գերագույն դատարանը հաստատել է դատախազության որոշումը՝ Ալեքսանդր Լապշինին Ադրբեջանին արտահանձնելու մասին։ Նա հենց երեկ արտահանձնվել է Ադրբեջանին:

Ռուսաստանի եւ Իսրայելի քաղաքացի Ալեքսանդր Լապշինը ձերբակալվել է 2016-ի դեկտեմբերին Մինսկում՝ Ադրբեջանի պահանջով, որտեղ նա ներառված է «սեւ ցուցակում» ԼՂՀ այցելության համար։

Նման անձանց մուտքն Ադրբեջան արգելվում է, Լապշինը, սակայն, 2015-ին Վրաստանի տարածքով եւ Ուկրաինայի քաղաքացու անձնագրով մտել էր Ադրբեջան այն բանի շնորհիվ, որ նրա անվան գրության մեջ տառի տարբերություն կա։ Ուկրաինական անձնագրում գրված է «Օլեկսանդր»։ Դրանից հետո Ադրբեջանը բլոգերի նկատմամբ հետախուզում էր հայտարարել՝ «Պետական սահմանի մասին» օրենքը խախտելու համար:

Հունվարի 17–ին Բելառուսի դատախազությունը որոշել էր բավարարել Ադրբեջանի պահանջը եւ արտահանձնել Լապշինին Ադրբեջանին։ Իսկ հունվարի 26–ին Մինսկի դատարանը մերժել էր Լապշինի փաստաբանների բողոքը: