Օսկանյանը շուտով կհայտարարի՝ ինչ ձեւաչափով են համագործակցելու Սեյրան Օհանյանի հետ
Քաղաքականություն
Վարդան Օսկանյանի «Համախմբում» կուսակցությունը շուտով կհայտարարի ապրիլի 2–ին կայանալիք խորհրդարանական ընտրություններին պաշտպանության նախկին նախարար Սեյրան Օհանյանի հետ համագործակցության ձեւաչափի մասին։ Այս մասին NEWS.am–ի հետ զրույցում ասել է «Համախմբում» կուսակցության փոխնախագահ Ստեփան Մարգարյանը։
«Եթե խոսքը վերաբերում է մեր եւ Սեյրան Օհանյանի խնդրին, ստացվում է` երկու բավականին մեծ վաստակ ունեցող անձինք, որոնք ունեն կառավարման բավականին լուրջ փորձ. Վարդան Օսկանյան, որը արտգործնախարարությունում աշխատել է 10 տարի, եւ Սեյրան Օհանյան, որը պաշտպանության նախարար է եղել տեւական ժամանակ եւ Արցախում լուրջ ավանդ ունեցող անձնավորություն, կարծում ենք` բավականին սոլիդ կլինի ունենալ դաշինքում այդ երկու անձանց: Ինչպիսի համագործակցություն կլինի ապագայում, դա շուտով կհայտարարենք, այժմ քննարկում ենք ձեւաչափը: Սեյրան Օհանյանը կուսակցական չէ, բայց մենք կգտնենք համագործակցության ձեւաչափը»,– ասաց նա։
Ստեփան Մարգարյանը չբացառեց նաեւ համագործակցության հնարավորությունը ընդդիմադիր այլ ուժերի, մասնակվորապես, «Լուսավոր Հայաստան» «Քաղաքացիական պայմանագիր» եւ «Հանրապետություն» կուսակցությունների ստեղծած «Ելք» դաշինքի հետ:
«Այս պահին չկան ինտենսիվ քննարկումներ այդ ուղղությամբ, մենք պատրաստ ենք քննարկել, այսինքն մեր այն հայտարարությունը, որ բոլոր ոչ իշխանական ուժերի հետ պատրաստ ենք քննարկել, ուժի մեջ է, մենք որեւէ խնդիր չենք դնում, ի սկզբանե ոչինչ չենք բացառում: Դեռ ժամանակ կա վերջնական որոշումներ կայացնելու, քննարկելու»,– ասաց նա:
1
2
3
4
5
1
2
3
4
5
