Առաջիկա ընտրություններում ավելի քիչ կաշառք կբաժանվի. ՀՀԿ պատգամավոր
Քաղաքականություն
ՀՀԿ-ն աշխատանք է տանում, որ խորհրդարանական ընտրությունները հնարավորինս զերծ լինեն նախորդ ընտրություններում տեղ գտած բոլոր թերություններից: Այս մասին այսօր՝ հունվարի 17-ին, լրագրողների հետ հանդիպման ժամանակ նշել է ԱԺ ՀՀԿ խմբակցության պատգամավոր Լեռնիկ Ալեքսանյանը:
Նրա խոսքով՝ այս ընտրություններն ավելի հրապարակային են լինելու, նյութական շահագրգռվածությունը նվազելու է. «Իմ լավատեսությունը, որ ընտրությունները մի քանի քայլ առաջ են լինելու, կապված է մի քանի նրբությունների հետ: Օրինակ՝ ռեյտինգային ցուցակները համարյա մեծամասնականի նման է, այսինքն՝ մարդն է ձայներ բերում կուսակցությանը, բայց այս դեպքում նաեւ ներկուսակցական պայքար է գնում. եթե նախկինում կուսակցությունները շահագրգռված էին, որ մեծամասնական ընտրակարգով իրենց թեկնածուն անցնի անպայման՝ անկախ իրենք ձայն կտանեն, թե ոչ, էստեղ կուսակցության մի քանի թեկնածուներ են պայքարելու իրար հետ»,- ասաց նա:
Ալեքսանյանի կարծիքով՝ ներկուսակցական պայքարը կնվազեցնի կոռուպցիայի դեպքերը ընտրությունների ժամանակ. «Եթե մեկը նյութապես ապահովված է, կարող է կաշառք բաժանել, մյուսը չի կարող, իրենք արդեն ներսում մրցակցելու են, որ չլինեն փող բաժանելու դեպքեր, որովհետեւ անձնական ռեյտինգը ավելի կարեւոր է: Օրինակ՝ մեկը ես, եթե իմ անունը գրվի ռեյտինգային ցուցակում, անպայման պայքարելու եմ, որ փող բաժանող չլինի»,- ավելացրեց պատգամավորը:
Նա նշեց նաեւ, որ Հանրապետական կուսակցությունը եւս ներկուսակցական բարեփոխումներ է անում՝ այդ խնդիրը վերացնելու համար:
«Եթե մեկն ընտրություններից 2 օր առաջ գնում մտնում էր մեկի տուն, մի հատ կոնյակ էր տալիս, չգիտեմ, մեղմ ասեմ՝ նյութապես շահագրգռում էր, հանրապետության նախագահը ուզենա էլ, չի կարող վերահսկել: Խոհանոցն է կարեւոր, էն մթնոլորտը, որը ստեղծվել է: Էսօր էդ մթնոլորտն ենք ստեղծում Հանրապետական կուսակցությունում, որ մաքուր ընտրություններ լինի»,- ասաց նա:
1
2
3
4
5
1
2
3
4
5
