Թուրքիայում քաղաքական ու հասարակական դաշտն ագրեսիվանում է. թուրքագետ

Թուրքիայում քաղաքական ու հասարակական դաշտն ագրեսիվանում է: Այս մասին, այսօր՝ դեկտեմբերի 27-ին, «Թուրքիայի ներքաղաքական զարգացումները եւ ազդեցությունը տարածաշրջանի եւ Հայաստանի վրա» թեմայով քննարկման ժամանակ նշել է ԵՊՀ Արևելագիտության ֆակուլտետի դեկանի տեղակալ, թուրքագետ Ռուբեն Մելքոնյանը:

Ամփոփելով 2016 թվականը Թուրքիայի համար, թուրքագետը, մասնավորապես, նշեց. «2017-ին Թուրքիայում տեղի կունենա սահմանադրական փոփոխությունների հանրաքվե, որով երկիրը խորհրդարականական կառավարումից կանցնի ուժեղ նախագահական ինստիտուտի: Բավական է նշել, որ նոր սահմանադրությամբ վերանում է վարչապետի ինստիտուտը:

Սահմանադրությամբ հանվում է նաեւ արգելքը, որ երկրի նախագահը չի կարող լինել որեւէ կուսակցության անդամ: Թուրքիայում տեղի ունեցող բոլոր իրադարձությունները միտված են այս խնդիրն ապահովելուն: Դրանով է պայմանավորված Դավութօղլուի հեռացումը վարչապետի պաշտոնից:

Սա Էրդողանի անձնական հավակնություններով պայմանավորված գործընթաց է, որն ունի երկու կարեւոր հենք. նախ Թուրքիայում քաղաքական ու հասարակական դաշտն ագրեսիվանում է եւ դա իր հետ բերում է ազգայնամոլական տրամադրությունների իսլամի ծայրահեղական դրսեւորումների աճ, կրոնամոլների ավելի ակտիվ գործունեություն: Բայց սա ունի ինստիտուցիոնալ հենք: Էրդողանի հենարանը հասարակությունում համեմատաբար կրոնամոլ տրամադրություն ունեցողներն են: Թուրքիայում հեղաշրջման փորձի ժամանակ Էրդողանի կոչով փողոց դուրս եկան տասնյակ հազարավոր մարդիկ, որոնց հագուստից անգամ պարզ էր դառնում, որ նրանք պատկանում են ծայրահեղական կրոնական հայացնքներ ունեցող շրջանակների: Հենց նրանք սատարեցին Էրդողանին»,-ասաց Թուրքիայի նախագահը:

Ինչ վերաբերում է Անկարայում ՌԴ դեսպանի սպանությանը, թուրքագետն ասաց, որ շատ հստակ է, որ թուրքական իշխանությունն ունի որոշակի պատասխանատվություն, որ ուժային կառույցներ ներթափանցել են այնպիսի անձինք, որոնք կարող են դեսպանի սպանություն իրականացնել՝ բղավելով «Ալլահ աքբար». «Այդպիսի մարդիկ եզակի չեն ուժային կառույցներում, շատ են: Իսկ իշխանության պատասխանտվությունն այն է, որ հենց Էրդողանի կազմակերպած սերնդափոխության հետեւանքով են այդպիսի մարդիկ հայտնվել ոստիկանությունում եւ այլ կառույցներում»,-ընդգծեց Ռուբեն Մելքոնյանը: