Ադրբեջանն ինքն իրեն փակուղի է մտցրել, գլխիվայր է դնում ամեն բան. Նալբանդյան

Ադրբեջանական կողմը միշտ փորձում է ներկայացնել, թե որեւէ պայմանավորվածություն ձեռք չի բերվել որեւէ հարցով՝ թե հետաքննության մեխանիզմների ներդրման, թե Կասպրշիկի թիմի ընդլայնման վերաբերյալ եւ շարունակում են պնդել դա: Այս մասին այսօր՝ դեկտեմբերի 9-ին, Համբուրգում ԵԱՀԿ արտգործնախարարների խորհրդի նիստի արդյունքում կայացած  ճեպազրույցի ընթացքում ասել է ՀՀ արտաքին գործերի նախարար Էդվարդ Նալբանդյանը:

Դիտարկմանը, որ Ռուսաստանի ԱԳ նախարար Սերգեյ Լավրովն նշել է, որ վեճ կա, թե Կասպրշիկի թիմի ընդլայնման դեպքում՝ որտեղ են տեղակայվելու նրանք, որ ՌԴ-ն կողմ է, որ դրանք լինեն շփման գծում, Նալբանդյանն արձագանքեց. «Ադրբեջանական կողմը միշտ փորձում է ներկայացնել, թե որեւէ պայմանավորվածություն ձեռք չի բերվել որեւէ հարցով՝ թե հետաքննության մեխանիզմների ներդրման, թե Կասպրշիկի թիմի ընդլայնման վերաբերյալ եւ շարունակում են պնդել դա: Իսկ եռանախագահները ոչ միայն ասացին Վիեննայում ձեռք բերված պայմանավորվածության մասին, այլեւ ասացին, որ հետաքննության մեխանիզմի ստեղծման պայմանավորվածության վերաբերյալ առաջընթաց պետք է գրանցել, նաեւ նշեցին, որ խոչընդոտները պետք է վերացնեն, որոնք ուղղված են ԵԱՀԿ գործող նախագահի անձնական ներկայացուցչի թիմի ընդլայնմանը: Ինչի մասին է խոսքը, եթե ավելացնենք թիվը մի քանի հոգով, բան չի փոխելու, որովհետեւ կան կոնֆլիկտային իրավիճակներ, որտեղ ոչ թե 5-10 կամ քսան հոգի է պետք, այլ 200-300 է ներկա, բայց նորից շատ բան չի փոխում: Բայց շատ կարեւոր է, որ ինչ-որ սիմվոլիկ քայլ կարող է արվել, որ շարժվում են առաջ, դիտորդական առաքելությունները ավելացնեն քանակը, որակը, արդյունավետությունը»:

Նալբանդյանի խոսքով, Ադրբեջանը սկզբում դեմ էր ընդհանրապես, հետո ասաց, թե ավելացրեք 7-ով, բայց չտեղակայենք շփման գծում, այլ ուղարկենք Բաքու, Թբիլիսի եւ Երեւան եւ թույլտվություն վերցնեն Ադրբեջանից` գալու շփման գիծ:

«Այլ խոչընդոտներ էլ կան. մինչեւ հիմա բազմաթիվ հանձնաժողովների նիստեր են եղել, որի ժամանակ միայն Ադրբեջանն է խոչընդոտել: Կարծում եմ` Լավրովն էլ է նույն բանն ասել, իսկ մեխանիզմի մասին Ադրբեջանը ասում է` ընդհանրապես դեմ է, ասում է` մենք կարող ենք մեխանիզմ ներդնել, երբ կարգավորումը լինի, բայց դրանից հետո ի՞նչ միջադեպի հետաքննության մեխանիզմի մասին է խոսքը: Իրենք իրենց փակուղի են մտցրել, գլխիվայր են դնում ընդհանրապես: Ամբողջ աշխարհը մի բան է խոսում, իրենք ուրիշ ձեւ են հասկանում, ծուռ հայելիների թագավորություն է, մյուսներին էլ փորձում են պարտադրել իրենց տեսակետները»,-ասաց ՀՀ ԱԳ նախարարը :