Հրանուշ Հակոբյանը՝ Հայաստանի ընտրություններում սփյուռքի դիտորդական առաքելության մասին

Եթե խորհրդարանական ընտրություններում հայկական սփյուռքի ներկայացուցիչների դիտորդական առաքելությունն օրենքի սահմաններում լինի, եթե դա թույլ տա ՀՀ Ընտրական օրենսգիրքը, ապա դրա մեջ ոչ մի խնդիր չկա: Այս մասին դեկտեմբերի 6-ին՝ ԱԺ-ում լրագրողների հետ զրույցում հայտարարեց սփյուռքի նախարար Հրանուշ Հակոբյանը:

Նրա խոսքով՝ այս հարցում հարկ է առաջնորդվել Ընտրական օրենսգրքով, որը, նրա խոսքով, տեխնիկական եւ ներդրումային տեսակետից կատարելագործվել է, որպեսզի ամեն ինչ բաց եւ թափանցիկ լինի: «Այնպես որ, եթե օրենքը թույլ տա խորհրդարանական ընտրություններում սփյուռքի ներկայացուցիչների դիտորդական առաքելության մասնակցությունը, ես դա միայն ողջունում եմ: Եթե ցանկանում են, թող գան, ես դրա մեջ խնդիր չեմ տեսնում»,- նշեց Հակոբյանը: 

Այնուհետեւ իր խոսքն ամփոփելով՝ ասաց, որ ի վերջո, ընտրություններին նաեւ միջազգային դիտորդներ են մասնակցում: «Ուզում եմ ասել, որ քաղաքակն կամքն արդեն դրսեւորվել է: Ընդդիմության եւ իշխանության միասնական պահանջով ընտրողների ցուցակները կհրապարակվեն: Այնպիսի իրավիճակ է ստեղծվել, որ անցած 25 տարիների ընթացքում առաջին անգամ իշխանությունն ու ընդիմությունը միասին են այդ փաստաթուղթն ընդունել: Եկեք օգնենք, որ փաստաթուղթը ճիշտ կիրառվի: Ես դրա կողմնակիցն եմ, 6 անգամ մեծամասնական ընտրակարգով խորհրդարանի անդամ եմ դարձել՝ առանց որեւէ նորմայի խախտման, եւ հաղթել եմ 4-7 տղամարդկանց մրցակցությամբ»,- ընդգծեց Հրանուշ Հակոբյանը:

Հիշեցնենք, որ ամերիկահայ ռոք երաժիշտ եւ երգահան, աշխարհահռչակ System of a Down խմբի հիմնադիր եւ մենակատար Սերժ Թանկյանն ապրիլին գալու է Հայաստան` որպես դիտորդ մասնակցելու խորհրդարանական ընտրություններին: 
Բացի Թանկյանից` Հայաստան են ժամանելու նաեւ կանադահայ կինոռեժիսոր Ատոմ Եգոյանը, կանադահայ դերասանուհի Արսինե Խանջյանը եւ ուրիշ հայտնի սփյուռքահայ մտավորականներ