Հայ պատգամավորները Գերմանիայում քննարկել են ԼՂ խնդիրը, ԵՏՄ-ին վերաբերող հարցեր
Քաղաքականություն
Հայաստանի ԱԺ արտաքին հարաբերությունների մշտական հանձնաժողովի նախագահ Արտակ Զաքարյանի գլխավորած պատվիրակությունը նոյեմբերի 9-11-ին Բեռլինում քննարկել է ԼՂ խնդիրը, ինչպես նաեւ ԵՏՄ-ին վերաբերող հարցեր:
ԱԺ-ից NEWS.am-ին հայտնում են, որ հայկական պատվիրակության կազմում ընդգրկված էին ԱԺ արտաքին հարաբերությունների մշտական հանձնաժողովի նախագահի տեղակալ Ալեքսանդր Արզումանյանը, ԱԺ տնտեսական հարցերի մշտական հանձնաժողովի նախագահի տեղակալ Միքայել Մելքումյանը, ԱԺ ֆինանսավարկային եւ բյուջետային հարցերի մշտական հանձնաժողովի նախագահի տեղակալ Աղվան Վարդանյանը, ՀՀ տնտեսական զարգացման եւ ներդրումների նախարարի առաջին տեղակալ Գարեգին Մելքոնյանը:
Այցի ընթացքում պատվիրակությունը հանդիպումներ է ունեցել Գերմանիայի Բունդեսթագի փոխնախագահ Էդելգարդ Բուլմանի, տարբեր խմբակցությունների պատգամավորների, ԳԴՀ կառավարության հատուկ հանձնակատար, Արեւելյան գործընկերության երկրների հետ հարաբերությունները համակարգող Գերնոտ Էրլերի, Գերմանիայի ԱԳՆ Արեւելյան Եվրոպայի, Հարավային Կովկասի եւ Կենտրոնական Ասիայի հարցերով հանձնակատար Անդրեաս Պեշկեի հետ: Հանդիպումներ են անցկացվել նաեւ ԳԴՀ տնտեսական զարգացման եւ համագործակցության նախարարությունում, Կենտրոնական եւ Արեւելյան Եվրոպայի տարածաշրջանի գծով գերմանական գործարարների ասոցիացիայում, «Ֆրիդրիխ Էբերթ» հիմնադրամում:
Հանդիպումներին պատվիրակության անդամները ներկայացրել են Հայաստանի արտաքին քաղաքական առաջնահերթությունները, անդրադարձել են տարածաշրջանային անվտանգության հարցերին, Հայաստան-Եվրամիություն հարաբերություններին, Լեռնային Ղարաբաղի հակամարտության կարգավորման գործընթացի առաջմղման ուղղությամբ Հայաստանի եւ ԵԱՀԿ Մինսկի խմբի համանախագահների կողմից գործադրվող ջանքերին:
Պայմանավորվածություններ են ձեռք բերվել` շարունակելու համագործակցությունը ինչպես խորհրդարանական ձեւաչափով, այնպես էլ գործարար շփումներն ակտիվացնելու, համատեղ գործարար համաժողովներ կազմակերպելու շուրջ:
Քննարկվել են առաջիկայում միջին բիզնեսի ներկայացուցիչների մասնակցությամբ բիզնես ֆորում անցկացնելու հետ կապված հարցեր:
Հայկական պատվիրակությունը մանրամասն ներկայացրել է ԵՏՄ շրջանակում Հայաստանի ներգրավվածության, իրավական եւ տնտեսական հնարավորությունների, ինչպես նաեւ ՀՀ-ում բիզնես միջավայրի շարունակական բարելավմանն ուղղված աշխատանքները:
Քննարկվել են նաեւ տարածաշրջանային կարեւորության մի շարք խնդիրներ եւ կայուն զարգացման անհրաժեշտությանն առնչվող հարցեր:
Պատվիրակության այցը Գերմանիա կազմակերպվել էր գերմանական «Ֆրիդրիխ Էբերթ» հիմնադրամի եւ ՀՀ դեսպանության գործուն աջակցությամբ:
1
2
3
4
5
1
2
5
3
5
