էթիկայի հանձնաժողովը խախտել էր ԱԺ կանոնակարգը. ո՞վ էր մեղավոր

Հայաստանի ԱԺ Էթիկայի հանձնաժողովը խախտել է ԱԺ կանոնակարգը՝ հանձնաժողովի նախագահ ընտրելով ոչ թե ԲՀԿ-ի ներկայացուցչին, այլ ՀՀԿ-ի, հաղորդում է parliamentmonitoring.am-ը:

Բանն այն է, որ ըստ ԱԺ կանոնակարգ օրենքի 24-րդ հոդվածի՝ էթիկայի ժամանակավոր հանձնաժողովի նախագահի պաշտոնը հաջորդաբար զբաղեցնում են ամենամեծ ընդդդիմադիր եւ ոչ ընդդիմադիր խմբակցությունների անդամները: Նախորդ՝ 9-րդ նստաշրջանում հանձնաժողովը, որպես ամենամեծ ոչ ընդդիմադիր խմբակցության ներկայացուցիչ, ղեկավարում էր Խոսրով Հարությունյանը՝ ՀՀԿ խմբակցությունից, ինչը նշանակում էր, որ ընթացիկ 10-րդ նստաշրջանում նախագահի պաշտոնը պետք է զբաղեցներ ամենամեծ ընդդիմադիր, այն է՝ ԲՀԿ խմբակցության ներկայացուցիչը: Սակայն Էթիկայի հանձնաժողովի նախագահ է ընտրվել նորից ՀՀԿ-ի ներկայացուցիչը՝ այս անգամ Սուքիաս Ավետիսյանը:

Հանձնաժողովի անդամ Թեւան Պողոսյանը տարակուսած էր, թե ինչպես կարող էր խախտվել օրենքով սահմանված կարգը: «Հանձնաժողովը դեռ նիստ չի արել, որպեսզի մենք տեղեկացված լինեինք, թե ով է նախագահելու այն: Նախագահի հարցը կարգավորում է կանոնակարգ-օրենքը, ավտոմատ: Եթե նախորդ նստաշրջանում նախագահը եղել է ՀՀԿ խմբակցությունից, ապա այս նստաշրջանում, առանց հատուկ քննարկման, պետք է լինի ԲՀԿ-ից»,-ասաց Թեւան Պողոսյանը:

Սուքիաս Ավետիսյանն էլ էր տարակուսած, բայց ոչ սահմանված հաջորդականության խախտման փաստից: Նրան զարմացրեց մեր հարցը, թե ինչո՞ւ է ՀՀԿ-ական Խոսրով Հարությունյանից հետո հանձնաժողովի նախագահությունը փոխանցվել իրեն եւ ոչ թե ԲՀԿ-ի ներկայացուցիչ Լյովա Խաչատրյանին: Սուքիաս Ավետիսյանը չէր հիշում, որ նախորդ՝ 9-րդ նստաշրջանում հանձնաժողովը ղեկավարել է ՀՀԿ-ն: Դրա համար էլ նախ ասաց, թե «այո, այդպես էլ պետք է լիներ, որովհետեւ ամենամեծ ընդդիմադիր եւ ոչ ընդդիմադիր խմբակցությունները ղեկավարում են ռոտացիայով», հետո, երբ պնդեցինք, որ նախորդ հանձնաժողովի նախագահը Խոսրով Հարությունյանն էր, Սուքիաս Ավետիսյանը պատասխանեց. «Չեմ կարող ասել: Երեւի մեզ երկու անգամ է հասնում»: Նկատենք, որ Ավետիսյանը նախորդ նստաշրջանում եղել է էթիկայի հանձնաժողովի անդամ, ու գոնե նա պետք է իմանար, որ կանոնակարգ-օրենքը չէր կարող թույլ տալ, որ «իրենց երկու անգամ հասնի»:

Էթիկայի հանձնաժողովում ԲՀԿ-ի ներկայացուցիչ Լյովա Խաչատրյանը, իմանալով օրենքը, ենթադրել է, որ հանձնաժողովը 10-րդ նստաշրջանում ղեկավարելու է ինքը, մինչդեռ իրեն ընդամենը զանգահարել ու ասել են, որ ուրբաթ օրը նիստ է կայանալու:

Լյովա Խաչատրյանը դեռ հույսը չի կորցրել: Կատակեց. «Սպասենք,ամսի 11-ը գա: Գուցե նիստում որոշվում է, որ ես եմ հանձնաժողովի նախագահը»: Բայց երբ տեղեկացրինք, որ Ազգային ժողովի կայքում, հանձնաժողովի էջում, արդեն տեղադրված է նիստի օրակարգը՝ հրավիրված հանձնաժողովի նախագահ Սուքիաս Ավետիսյանի կողմից, տարակուսեց. «Այսինքն, ո՞նց: Համ իր հարցը պիտի քննարկվի, համ էլ նիստը ինքը պետք է նախագահի՞»: Լյովա Խաչատրյանը վրդվված էր: Ասաց՝ ԱԺ նախագահ Գալուստ Սահակյանը այնքան է կանոնակարգի խախտումներ թույլ տվել, որ հիմա էլ, կանոնակարգը խախտելով էթիկայի հանձնաժողովի նախագահ է նշանակել Սուքիաս Ավետիսյանին:

Այս խնդրի առնչությամբ, ԱԺ հասարակայնության եւ տեղեկատվության միջոցների հետ կապերի վարչության պետ Արսեն Բաբայանը տեղեկացրել է, թե բոլոր հանձնաժողովների նախագահների նշանակման մասին ԱԺ նախագահի գրավոր կարգադրությունը պարտադիր է: Դրանից հետո մոտ մեկ ժամ պահանջվեց, որպեսզի ԱԺ հասարակայնության եւ տեղեկատվության միջոցների հետ կապերի վարչության պետը եւս մեկ անգամ ճշտեր իրավիճակի մանրամասները ու ձեւակերպեր պատճառաբանությունը. այն է՝ մեղավորը Ազգային ժողովի պաշտոնական կայքն է ու դրա համապատասխան աշխատակիցը՝ Սուքիաս Ավետիսյանի ու Լյովա Խաչատրյանի անունները խառնելու համար: Անունները կայքում փոխվեցին, փոխվե՞ց նաեւ ԱԺ նախագահի կարգադրությունը, հայտնի չէ:

Ի դեպ, «Մեդիա եւ իրավունք» կազմակերպությունը, որի դիմումը պետք է քննարկվի նոյեմբերի 11-ին, էթիկայի հանձնաժողովի նիստում, վիճարկում է հենց Սուքիաս Ավետիսյանի նախագահությամբ նիստը անցկացնելու հարցը, քանի որ դիմումում նշված է նաեւ նրա անունը՝ որպես ուրիշի փոխարեն քվեարկած պատգամավոր: