Առաջին պահին մտածեցինք, թե հումոր են անում. Գալուստ Սահակյանը՝ «Հոկտեմբերի 27»-ի մեջ դրսի հետք է տեսնում

Հետաքրքիրն նա էր, որ ամբողջ դահլիճն առաջին պահին մտածեց, որ ինչ-որ հումոր են անում. մի քանի րոպե եղավ այն, ինչի մասին գիտեք: Այս մասին, այսօր՝ հոկտեմբերի 27-ին ԱԺ տարածքում «Հոկտեմբերի 27»-ի զոհերի հիշատակի արարողությունից հետո լրագրողների հետ զրույցում նշել է ԱԺ նախագահ Գալուստ Սահակյանը:

«Այս ողբերգությունը ոչ միայն մեր պետության, այլեւ մեր ազգի համար դժվարին եւ դաժան բան էր»,-ասաց նա:

Իսկ թե ինչու չբացահայտվեց ոճրագործությունը, Գալուստ Սահակյանը պատասխանեց, թե նրանք, ովքեր մասնակցեցին, բոլորն էլ կալանավորված են. «Դա իմ պատկերացումներն են, որ մտածում եմ, որոշակիորեն ինչ-որ տեղից կարողացել են ինչ-որ բան կազմակերպել»:

Ճշտող հարցին, թե այսինքն՝ դրսի՞ց են ոճրագործներն աջակցություն ունեցել, ԱԺ նախագահն արձագանքեց. «Բնականաբար, չեմ կարծում, որ հայերի միջից նման բան հնարավոր է անել»:

Հիշեցնենք, որ 17 տարի առաջ` հոկտեմբերի 27-ին, ոճրագործների խումբը` Նաիրի Հունանյանի գլխավորությամբ, ներխուժեցին Հայաստանի Ազգային ժողովի նիստերի դահլիճ եւ դիմահար կրակոցներով սպանեցին կառավարության եւ խորհրդարանի անդամներին:

Ահաբեկչության զոհ դարձան երկրի վարչապետ, Սպարապետ Վազգեն Սարգսյանը, խորհրդարանի նախագահ Կարեն Դեմիրճյանը, ԱԺ փոխնախագահներ Յուրի Բախշյանն ու Ռուբեն Միրոյանը, օպերատիվ հարցերի նախարար Լեոնարդ Պետրոսյանը, խորհրդարանի պատգամավորներ Արմենակ Արմենակյանը, Հենրիկ Աբրահամյանը եւ Միքայել Քոթանյանը:

Ահաբեկիչների նկատմամբ դատավարությունը տեւեց 2001-2003 թվականները: 6 ահաբեկիչները, այդ թվում` նրանց ղեկավար Նաիրի Հունանյանը, նրա եղբայր Կարեն Հունանյանը, նրա քեռին՝ Վռամ Գալստյանը, Դերենիկ Բեջանյանը, Էդիկ Գրիգորյանը եւ Աշոտ Կնյազյանը  դատապարտվեցին ցմահ ազատազրկման: Համլետ Ստեփանյանը դատապարտվեց 14 տարվա ազատազրկման:

3 տարի տեւած դատավարությունն այդպես էլ չկարողացավ կամ չցանկացավ վեր հանել ահաբեկչության կազմակերպիչներին եւ մինչ օրս էլ հասարակությունը լուրջ կասկածներ ունի կազմակերպիչների մասով: