Նալբանդյանը Մալթայի Ուխտի կանցլերին ներկայացրել է իրավիճակը շփման գծում
Ուշադրության կենտրոնում
Հոկտեմբերի 24-ին տեղի ունեցավ Հայաստանի արտգործնախարար Էդվարդ Նալբանդյանի եւ Մալթայի Ինքնիշխան Մարտական Ուխտի կանցլեր եւ արտաքին գործերի նախարար Ալբրեխտ ֆոն Բեզըլագերի հանդիպումը, ով Հայաստան է ժամանել Մալթայի Ինքնիշխան Մարտական Ուխտի Արքայազն եւ մեծ վարպետ Ֆրա Մեթյու Ֆեսթինգի գլխավորած պատվիրակության կազմում:
Զրուցակիցներն անդրադարձան Հայաստանի եւ Մալթայի Մարտական Ուխտի միջեւ հաստատված բարեկամական հարաբերություններին եւ քննարկեցին դրանց զարգացմանն ուղղված քայլերը:
Էդվարդ Նալբանդյանը նշեց, որ դեռեւս միջնադարում Կիլիկիո Հայոց Թագավորության եւ Ուխտի միջեւ հաստատված սերտ փոխգործակցությունը պատմական եւ մշակութային ամուր հիմք է հանդիսանում համագործակցության ընդլայնման եւ ամրապնդման առումով: Նախարար Նալբանդյանը բարձր գնահատեց Մալթայի Ինքնիշխան Ուխտի կողմից Հայաստանում եւ Արցախում իրականացվող մարդասիրական ծրագրերը։
Բարոն Ալբրեխտ ֆոն Բեզըլագերը վստահություն հայտնեց, որ Մալթայի Ուխտի մեծ վարպետի պետական այցելությունը Հայաստան նոր էջ կբացի երկկողմ հարաբերություններում։
Էդվարդ Նալբանդյանը եւ Ալբրեխտ ֆոն Բեզըլագերը քննարկեցին միջազգային եւ տարածաշրջանային արդի խնդիրները, Մերձավոր Արեւելքում իրավիճակը, սիրիական ճգնաժամը։
Էդվարդ Նալբանդյանը ներկայացրեց ապրիլին Արցախի դեմ Ադրբեջանի ագրեսիայի հետեւանքները, միջազգային մարդասիրական իրավունքի եւ միջազգային մարդու իրավունքների կոպտագույն խախտումները, որոնք հետ գցեցին խաղաղ կարգավորման բանակցային գործընթացը: Միաժամանակ, նախարար Նալբանդյանն անդրադարձավ ղարաբաղյան հիմնախնդրի խաղաղ կարգավորման գործընթացում առաջընթացի ապահովման համար համապատասխան պայմանների ստեղծմանն ուղղված՝ Հայաստանի եւ ԵԱՀԿ Մինսկի խմբի համանախագահների համատեղ ջանքերին:
1
2
3
4
5
1
2
3
4
5
3
4
5
