10 հազար երեխա կորած է համարվում. ԵԽԽՎ-ն ընդունեց առանց խնամակալության մնացած երեխաների մասին բանաձեւ

Եվրոպայի խորհրդի խորհրդարանական վեհաժողովն այսօր՝ հոկտեմբերի 13-ին, ընդունեց «Եվրոպայում առանց խնամակալության մնացած անչափահասների պաշտպանության մասին» բանաձեւ:

NEWS.am-ի հատուկ թղթակիցը Ստրասբուրգից հաղորդում է, որ զեկույցի հեղինակը իտալացի պատգամավոր Մանլիո Դի Ստեֆանոն է: Նա նշեց, որ Եվրոպայում երեխաները ավելի քան երբեք պաշտպանության եւ օգնության կարիք ունեն: Միայն 2016թ. հունվարի 1-ի տվյալներով, Եվրոպա տեղափոխված եւ առանց խնամակալության մասին երեխաներից 10 հազարը կորել են:

«2015թ. 90 հազար երեխա է դիմել ԵՄ կառույցներին՝ ապաստան ստանալու խնդրանքով, միայն այս տարվա հունիսի մեկի դրությամբ արդեն 30 հազար երեխա է ապաստան խնդրել: Պաշտոնական տվյալներով, 10 հազար երեխա կորած է համարվում, թե ո՞ւր են նրանք, հայտնի չէ: Փաստ է, որ շատ երեխաներ սեռական շահագործման են ենթարկվում, կամ ստրկության, կամ տարատեսակ ճնշումների եւ բռնությունների»,- ասաց իտալացի պատգամավորը:

Ելույթ ունեցող պատգամավորներն իրենց աջակցությունը հայտնեցին զեկույցի հեղինակին՝ նշելով, որ շատ կարեւոր զեկույց է: Մասնավորապես, դանիացի Նիկոլայ Վիլլումսենի խոսքով, միլիոնավոր երեխաներ ստիպված են հեռանալ իրենց տներից հենց պատերազմի պատճառով եւ օգնության կարիք ունեն: Ավստրիացի Էդուարդ Կոկն էլ ընդգծեց, որ կորած երեխաների ճակատագիրը շատ մտահոգիչ է, քանի որ պարզ չէ, թե ուր են հեռացել այս երեխաները ճամբարներից՝ իրենց ծնողների՞ մոտ, թե՞ որեւէ տեղ ստրկության են ենթարկվում:

Զեկույցին կողմ քվեարկեց 43 եւ ձեռնպահ 1 պատգամավոր: