Ռումինացի երկրպագուները Հայոց Ցեղասպանության պաստառի ու FAF-ի մասին (ֆոտո)

Աշխարհի առաջնության 2018 ընտրական փուլի Հայաստան-Ռումինիա խաղը դիտելու էին եկել Ռումինիայի հավաքականի երկրպագուները: Ուլտրասների խումբը կոչվում է Uniti Sub Tricolor` Եռագույնի ներքո միավորվածները: Նրանք Հայաստան էին ժամանել Ռումինիայից՝ ավտոմեքենաներով: Հատուկ այս խաղի համար նրանք պաստառ էին բերել՝ Հայոց Ցեղասպանությանը նվիրված, սակայն ոստիկանության ու մարզադաշտի անվտանգության աշխատակիցները չէին թողել այն ներս մցնել:

Հայոց Ցեղասպանության պաստառի մասին

Ռումինիայի հավաքականի հետ մեկնել ենք արտագնա բազմաթիվ խաղերի:Այստեղ էլ եկել ենք մեր ավտոմեքենաներով: Այսօր մեկնում ենք Ղազախստան, բայց արդեն ինքնաթիռով: Հայաստանից Ղազախստան ճանապարհն այդքան էլ լավը չէ: Մեզ հետ Ռումինիայից բերել էինք պաստառ՝ նվիրված Հայոց Ցեղասպաությանը, որտեղ գրված էր՝ «1,5 միլիոն խաչեր փայլում են երկնքում, ի վերջո ինչ- որ մեկը պետք է ասի` ներեք մեզ: «Ինչ-որ մեկ» բառը գրված էր Թուրքիայի լիալուսինով: Բայց մեզ չթողեցին այդ պաստառը ներս մցնել: Մենք փորձել էինք այն թաքցնել մեր հագուստի մեջ, բայց չստացվեց: Խաղի ժամանակ էլ երգում էինք երգեր Ցեղասպանության մասին: Մեզ թվաց, թե հայ երկրպագուները կմիանան ու կաջակցեն: Բայց հետո հասկացանք, որ ոչ բոլորն են այստեղ տիրապետում անգլերենին: Մենք շատ լավ գիտենք հայոց պատմության այդ տխուր էջի մասին: Ռումինիայում շատ հայեր են ապրում: Պաստառը մեր շարժման անդամներից մի քանիսի գաղափարն էր: Մենք այն, միևնույն է, բացեցինք: Արդեն խաղից հետո՝ քաղաքի կենտրոնում:

Խաղի ժամանակ անցկացրած ակցիաների մասին

Հայաստան-Ռումինիա խաղի ժամանակ մենք բազմաթիվ ճայթռուկներ վառեցինք: Դա մեր բողոքի նշանն էր: Մենք չենք ցանկանում, որ մեր ֆեդերացիային տուգանեն կամ վնասենք, բայց մենք դեմ ենք շատ բաներին, ինչ տեղի է ունենում ռումինական ֆուտբոլում: Մեր ֆուտբոլը ողողված է բազվաթիվ լեգիոներներով: Բայց մենք ցանկանում ենք, որպեսզի զարգանա մանկապատանեկան ֆուտբոլը, շեշտը դրվի տեղացի ֆուտբոլիստների վրա: Մենք շատ ակցիաներ ենք կազմակերպում այդ առթիվ:

FAF-ին աջակցելու մասին

Խաղի ժամանակ տեսանք, որ մեր կողքին նստած երկրպագուների շարժմանը ոստիկանները սկսեցին ճնշել: Չէին թողնում, որ նրանք իրանց դրոշը կախեին: Մենք էլ սկսեցինք աջակցել իրենց: Շատ լավ հասկանում ենք նրանց վիճակը: Ինքներս այդ վիճակում հայտնվում ենք հաճախ: Բայց ուզում ենք մեր աջակցությունը հայտնել նրանց ու այն ամենին, ինչ իրենք անում ենք: Սպասելու ենք նրանց Ռումինիայում: Հայաստանից հեռանում ենք շատ լավ տպավորություններով:

Վերա Մարտիրոսյան