Խորհրդարանական ընտրություններ Վրաստանում. հայկական համայնքը՝ դրական արդյունքների սպասումով

Վրաստանում հոկտեմբերի 8-ին խորհրդարանական ընտրություններ կկայանան։ Ընտրողները չորսամյա ժամկետով կձեւավորեն 150 պատգամավորից կազմված նոր խորհրդարանը։ Վրաստանում խորհրդարանական ընտրություններին կմասնակցի 26 հայ թեկնածու։

Աննախադեպ թվով հայ թեկնածուների մասնակցությունը խորհրդարանական ընտրություններին պետք է դրական ազդեցություն ունենա երկրի հայկական համայնքի վրա։ Այս մասին NEWS.am–ի հետ զրույցում ասել է ՀՀԿ խմբակցության պատգամավոր, «Ջավախք» հայրենակցական միության ղեկավար Շիրակ Թորոսյանը։

Նրա խոսքով՝ թեպետ վիրահայերը, մասնավորապես, Ջավախքի հայերը երկրի լիիրավ քաղաքացիներ են, այդուհանդերձ մինչեւ հիմա նրանք ներգրավված չեն եղել երկրի ներքաղաքական կյանքին։ «Նրանք միշտ դուրս են մնացել ներքաղաքական գործընթացներից։ Հիմա Վրաստանի քաղաքական ուժերն ավելի առողջ մոտեցում են ցուցաբերում՝ հայերին ներգրավելով ներքաղաքական գործընթացներին, ներառելով նրանց համամասնական ցուցակների  ցուցակների անցողիկ տեղերում։ Դրանով իսկ քաղաքական ուժերը կարող են ստանալ հայերի ձայները, իսկ մյուս կողմից դա շահավետ կլինի հայկական համայնքի համար, որը խորհրդարանում իր ներկայացուցիչներին կունենա»,– ասել է Թորոսյանը։

Բացի այդ, հայերն առաջադրվել են եւ մեծամասնական ընտրական համակարգով, ինչը, Թորոսյանի կարծիքով, պակաս կարեւոր չէ։

Միաժամանակ պատգամավորի խոսքով՝ միշտ էլ մտահոգություն կա, որ հայ պատգամավորներն առաջին հերթին առաջ կմղեն իրենց կուսակցության շահերը, իսկ հետո հայկական համայնքինը։ «Այդ հարցում մխիթարական է այն գործոնը, որ կուսակցությունների միջեւ ընթանում է քաղաքական պայքար, եւ ամեն մեկը հայկական համայնքին կոնկրետ խոստումներ է տալիս, որոնք մտնում են նախընտրական քարոզարշավի մեջ, եւ դա հուսադրող է։ Մինչեւ 2012 թվականը Ջավախքում կուսակցությունների միջեւ իրական քաղաքական պայքար չի եղեկ, հիմա այն կա, եւ դա արմատապես փոխում է իրավիճակը»։

«Վրացական երազանք» իշխող կուսակցության համամասնական ցուցակում կա 155 թեկնածու, որտեղ հավասարապես ներկայացված են հայ եւ ադրբեջանցի թեկնածուները՝ 3-ական ներկայացուցիչ։

Առաջին անգամ հայ պատգամավորը զբաղեցնում է համամասնական ցուցակի 19-րդ տեղը՝ առաջ անցնելով էթնիկ փոքրամասնությունների ներկայացուցիչներից։ «Վրացական երազանք. ժողովրդավարական Վրաստան» կուսակցությունը հայաբնակ Ախալքալաքում եւ Նինօծմինդայում մեծամասնական համակարգով առաջադրել է գործող պատգամավոր Հենզել Մկոյանին։ Մեծամասնական ցուցակի 23-րդ համարը գործարար Սամվել Մարուքյանն է։

«Միավորված ազգային շարժում» կուսակցությունից  Ախալքալաքի եւ Նինօծմինդայի ընտրական շրջանների մեծամասնական ցուցակում թեկնածուն Արսեն Կարապետյանն է։

«Միավորված ազգային շարժման» համամասնական ցուցակում կա 4 հայ՝ 31-րդ տեղում Արսեն Կարապետյանը, 50-րդում՝ Գեւորգ Շուշանյանը, 151-րդում՝ Նանա Մինասյանը, 173-րդում՝ Դիանա Թորոսյանը։

«Դավիթ Թարխան–Մոուրավի, Իրմա Ինաշվիլի– Վրաստանի հայրենասերների դաշինք, միավորված ընդդիմություն» բլոկը Ախալքալաքի եւ Նինօծմինդայի ընտրական շրջաններում առաջադրել է Մերուժան Կարախանյանի թեկնածությունը։ «Ազգային ֆորում»–ն առաջադրել է Արմենակ Փոլորչյանի թեկնածությունը Ախալքալաքում համամասնական ցուցակով։ «Փաաթա Բուրչուլաձե. Պետություն ժողովրդի համար» բլոկից մեծամասնական ցուցակով առաջադրվել է Շաքրո Այվազյանը։ Բլոկը համամասնական ցուցակի 18-րդ համարի տակ գրանցել է Մելքոն Մարգարյանին։

Հանրապետական կուսակցությունն Ախալքալաքում մեծամասնական ցուցակով առաջադրել է Աշոտ Սահարյանի թեկնածությունը։

Թբիլիսիում առաջադրվել են 8 հայ թեկնածու: «Վրացական երազանք-ժողովրդավարական Վրաստան» կուսակցության համամասնական ցուցակի 19-րդ համարում գործող պատգամավոր Ռուսլան Պողոսյանն է: Իրակլի Ալասանիայի «Ազատ դեմոկրատներ» կուսակցության համամասնական ցուցակի 21-րդ համարը Թբիլիսիում զբաղեցնում է  քաղաքացիական ակտիվիստ Միխեիլ Ավագյանը։

Թբիլիսիում մեծամասնական ընտրակարգով առաջադրվել է լրագրող Էդգար Բարսեղյանը, որը ներկայացնում է «Թաատա Բուրչուլաձե. Պետությունը ժողովրդի համար» դաշինքը: Մայրաքաղաքում նույն դաշինքից առաջադրված են եւս երկու հայ թեկնածուներ՝ Սերգո Խաչատրյանը եւ Արթուր Սարգսյանը:

Նշենք, որ այն քաղաքական կուսակցությունը կամ ընտրական դաշինքը, որն ընտրություններում ամենալավ արդյունքները կգրանցի, վարչապետի թեկնածու ներկայացնելու իրավունք կստանա: Հոկտեմբերի 8-ին Աջարիայում ընտրողները կընտրեն տեղական օրենսդիր մարմինը՝ Գերագույն խորհուրդը:

Վրաստանում գործում է խառը ընտրակարգ՝ խորհրդարանի 150 պատգամավորներից 77-ն ընտրվում են այն կուսակցությունների համամասնական ցուցակներից, որոնք հաղթահարել են 5 տոկոսի շեմը, իսկ մնացած 73 մեծամասնական պատգամավորներին կընտրեն միամանդատ ընտրատարածքներում:

Խորհրդարանական ընտրություններում ընտրողները պետք է լրացնեն երկու քվեաթերթիկ՝ մեկը տվյալ ընտրատարածքի համապատասխան մեծամասնական պատգամավորի, մյուսը՝ կուսակցության կամ ընտրական դաշինքի օգտին:

Մեծամասնական 73 մանդատի համար կպայքարեն 816 թեկնածուներ: Մեծամասնական ընտրակարգով ընտրվող պատգամավորի թեկնածուն առաջին իսկ փուլում պետք է ստանա ընտրողների ձայների 50 տոկոսից ավելին:

Երկրորդ փուլը լավագույն արդյունքներ գրանցած թեկնածուների միջեւ կանցկացվի այն դեպքում, եթե առաջին փուլում թեկնածուներից ոչ մեկը չկարողանա հաղթահարել 50 տոկոսանոց շեմը: Երկրորդ փուլը պետք է անցկացվի առաջին փուլից առավելագույնը 25 օր հետո:

Կուսակցական ցուցակներով, այսինքն՝ համամասնական ընտրակարգով խորհրդարանում պետք է տեղաբաշխվեն ընդամենը 77 մանդատներ:

Հոկտեմբերի 8-ին խորհրդարանական ընտրություններին մասնակցելու են 19 քաղաքական կուսակցություններ եւ 6 ընտրական դաշինքներ: