Սկսվել է Էստոնիայի նախագահի ընտրությունները

Էստոնիայի նախագահի ընտրությունները սկսվել են սեպտեմբերի 24-ին Ընտրիչների կոլեգիայում, որը հավաքվել է Տալլինի «Էստոնիա» ազգային օպերայի համերգային դահլիճում: Խորհրդարանի նախագահ Էյկի Նեստորն արդեն իսկ հայտարարել է քվեարկության սկսվելու մասին:

Այն տևելու է մեկ ժամ: Ինչպես հաղորդում է «ՌԻԱ Նովոստի» գործակալությունը, առաջին փուլում հաղթանակի համար թեկնածուները պետք է հավաքեն ընտրողների ձայների մեծամասնությունը: Էստոնիայի նախագահի պաշտոնի համար առաջին փուլում պայքարում են հինգ թեկնածու՝ իշխող «Բարեփոխում» կուսակցության պատվավոր նախագահ, Եվրոպական հանձնաժողովի նախկին փոխնախագահ Սիիյմ Կալասը, ընդդիմադիր «Կենտրոնական» կուսակցությունը ներկայացնող նախկին պատգամավոր Մայլիս Ռեպսը, Էստոնիայի արտաքին գործերի նախկին նախարար Մարինա Կալյուրանդը, Էստոնիայի խորհրդարանական «Պահպանողական» ա զգային կուսակցության ներկայացուցիչ Մարտ Հելմեն եւ փաստաբան Ալլար Յիիկսը:

Էստոնիայում գործում է անուղղակի ընտրությունների երկաստիճան համակարգ: Սկզբում պետության ղեկավար է փորձում ընտրել խորհրդարանը, բայց եթե թեկնածուներից ոչ ոք չի հավաքում անհրաժեշտ թվով ձայներ, ընտրությունները շարունակվում են Ընտրիչների կոլեգիայում:

Օգոստոսի 29-ին եւ 30-ին Էստոնիայի խորհրդարանում անցկացված ընտրությունների արդյունքում պատգամավորներին չհաջողվեց ընտրել պետության ղեկավար, քանի որ թեկնածուներից ոչ մեկը չէր հավաքել անհրաժեշտ քանակությամբ ձայներ:

Այսպիսով, ընտրությունները շարունակվել են Ընտրիչների կոլեգիայում, որտեղ ընդգրկված են խորհրդարանի 101 պատգամավոր եւ տեղական ինքնակառավարման մարմինների 234 ներկայացուցիչ: