Գերմանիայում կան ռեկորդային թվով պոտենցիալ վտանգավոր իսլամիստներ

Գերմանիայի ներքին գործերի նախարար Թոմաս դե Մեզյերը հայտարարել է, որ Գերմանիայում պոտենցիալ վտանգավոր իսլամիստների թիվը հասել է ռեկորդային բարձր մակարդակի և ներկա պահին անցնում է 520 մարդուց: Այս մասին հայտնում է Bild-ը:

«Պոտենցիալ վտանգավոր են կոչվում այն անձինք, որոնց նկատմամբ գոյություն ունի փաստերով ամրագրված ենթադրություն, որ նրանք ունակ են կատարելու քաղաքականապես մոտիվացված լուրջ բնույթի հանցագործություն: Նրանց թիվը կազմում է ավելի քան 520 մարդ, այդ թիվը մեծ է, քան երբևէ»,- հայտարարել է Մեզյերը Bild-ին տված հարցազրույցում:

Ինչպես նշել է դե Մեզյերը, ահաբեկչությունների վտանգը բխում է ինչպես սահմանից դուրս միավորումներից, այնպես էլ արմատականացված միայնակներից, ովքեր կարող են ներթափանցել եվրոպական երկրներ կամ արդեն ապրում են Գերմանիայի տարածքում: ՆԳ նախարարի խոսքով՝ «նրանց արմատականացումը տեղի է ունենում համացանցի կամ իսլամիստ քարոզիչների հետ շփման միջոցով»:

Նա նաև հայտնել է, որ պոտենցիալ սպառնալիք ներկայացնող իսլամիստներից 360-ը այս կամ այն կերպ կապված են ահաբեկիչների հետ և նրանց աջակցություն են ցուցաբերում ահաբեկչություններ կազմակերպելիս:

Թոմաս դե Մեզյերը նաև ավելացրել է, որ միայնակ գործող պոտենցիալ վտանգավոր անձանց հայտնաբերելն ավելի բարդ է, քան արմատական միավորումը բացահայտելը: «Նրանց կամ մյուսների կողմից սպառնալիքը այսօր շատ իրական է»,- ասել է նախարարը: