Փորձագետ. Մոտակա հեռանկարում Վրաստանը չի անդամակցի ՆԱՏՕ-ին. զգայունությունը չափազանց բարձր է

Վրաստանը մոտակա հեռանկարում չի անդամակցի ՆԱՏՕ-ին: Այդ մասին  NEWS.am-ի թղթակցի հետ զրույցում հայտնել է Միջազգային եւ անվտանգության հարցերի հայկական ինստիտուտի ղեկավար Ստեփան Սաֆարյանը:  

Նրա խոսքով, Վրաստանի զգայունությունը չափազանց բարձր է, հատկապես եթե հաշվի առնենք Ռուսաստանի մոտեցումները ՆԱՏՕ-ի ընդլայնման կամ Կովկասում ներկայության առումով:  «Ես նաեւ տեսնում եմ, որ ՆԱՏՕ-ի անդամ ոչ բոլորն են շահագրգռված այսպես կոչված  լարվածության խորացմամբ եւ այն Ռուսաստանի հետ բախման հասցնելով: Եվ դա  է  պատճառը, որ համապատասխան քաղաքական որոշում չի կայացվում:  Բայց Վրաստանի դեպքում շատ հետաքրքիր մոդել է ընտրվել. այնուամենայնիվ, Վրաստանը չափազանց մոտենում է ՆԱՏՕ-ին իր պաշտպանական եւ այլ համակարգերով», - նշել է Ստեփան Սաֆարյանը: 

Թիվ 1 գործընկերոջ կարգավիճակը, հիշեցրել է նա, որ Վրաստանին է շնորհվել Ուելսի գագաթնաժողովին, Վրաստանին դե ֆակտո բերել է Դաշինքի անդամի կարգավիճակի:   «ՆԱՏՕ-ին Վրաստանի դե յուրե միացման համար մեզ մոտ` Հարավային Կովկասում լիովին այլ իրավիճակ պետք է լինի, այլ Ռուսաստան, ՆԱՏՕ-ի հանդեպ ռուսաստանյան այլ քաղաքականություն»,  - ընդգծել է Ստեփան Սաֆարյանը` նշելով, որ տվյալ պահին ոչ ոք չի կարողանա ասել, թե երբ տեղի կունենա Վրաստանի դե յուրե անդամակցումը ՆԱՏՕ-ին: 

Իհարկե, շարունակել է նա, ՆԱՏՕ-ն միշտ դռները բաց կպահի:   «Իհարկե ՆԱՏՕ-ն կապահովի ոչ միայն ձեւական մասը, այլեւ Վրաստանում այնպիսի դե ֆակտո բարեփոխումներ, որոնց շնորհիվ Վրաստանը կդառնա ՆԱՏՕ-ի չափանիշներին  համապատասխանող երկիր: Վրաստանը տարածաշրջանում ՆԱՏՕ-ի հենարան դառնալու ամենամեծ շանսերն ունի, որովհետեւ նույնիսկ Թուրքիան չի կարող հավակնել ՆԱՏՕ-ի պլացդարմի դերի», - հավելել է Ստեփան Սաֆարյանը:

Հիշեցնենք, Թբիլիսի այցի ընթացքում ՆԱՏՕ-ի գլխավոր քարտուղար Յենս Սթոլթենբերգը Վրաստանի իշխանություններին հույս էր տվել, բայց հրաժարվել էր նշել երկրի` ՆԱՏՕ-ին անդամակցման ժամկետը:   «Վրաստանը ՆԱՏՕ-ի անդամ կդառնա, բայց դրա համար Վրաստանը պետք է հասնի անդամության համար անհրաժեշտ ստանդարտների: Դա այն է, ինչի վրա մենք աշխատում ենք Վրաստանի հետ, բարեփոխումներ ենք իրականացնում, որոնք Վրաստանին օգնում են մոտենալ ՆԱՏՕ-ին:  Ես ճշգրիտ ժամկետներ չեմ նշի, որովհետեւ դրանք կախված են Վրաստանում իրականացվող բարեփոխումների արդյունքներից», — ասել է Սթոլթենբերգը: