Հունաստանը նոր դեսպան ունի ՀՀ-ում. նա իր հավատարմագրերն է հանձնել Սերժ Սարգսյանին (Ֆոտո)

ՀՀ նախագահ Սերժ Սարգսյանին այսօր՝ սեպտեմբերի 6-ին, իր հավատարմագրերն է հանձնել Հայաստանի Հանրապետությունում Հունաստանի Հանրապետության նորանշանակ արտակարգ եւ լիազոր դեսպան Նաֆսիկա Նենսի Էվա Վրայլան:

ՀՀ նախագահի մամուլի գրասենյակից NEWS.am-ին հայտնում են, որ ՀՀ նախագահը շնորհավորել է դեսպանին պաշտոնն ստանձնելու կապակցությամբ եւ մաղթել հաջողություններ:

Միջպետական հարաբերությունների զարգացման գործում Հանրապետության նախագահը կարեւորել է դիվանագիտական ներկայացուցչությունների աշխատանքը, նշելով, որ այդ հարաբերությունները նոր նախաձեռնություններով ավելի ամրապնդելու եւ դրանց նոր դինամիկա հաղորդելու առումով մեծ ակնկալիքներ կան Հունաստանում Հայաստանի եւ Հայաստանում Հունաստանի նորանշանակ դեսպաններից:

Զրուցակիցները համակարծիք են եղել, որ երկկողմ հարաբերությունները պատմական խորը արմատներ ունեցող եւ մշտապես բարեկամության ու փոխադարձ վստահության դրսեւորումներով արտահայտվող հայ եւ հույն ժողովուրդների հարաբերությունների մակարդակին հասցնելու համար դեռեւս զգալի աշխատանք կա իրականացնելու: Այդ տեսանկյունից կարեւորվել է միջկառավարական հանձնաժողովի աշխատանքի ակտիվացումը, քաղաքական երկխոսությանը զուգահեռ առեւտրատնտեսական կապերի սերտացմամբ փոխշահավետ բազմաթիվ ոլորտներում համագործակցության խորացումը:

ՀՀ նախագահը եւ Հունաստանի դեսպանը երկու բարեկամ պետությունների հարաբերությունների զարգացման գործում մեծ դեր են վերապահել նաեւ խորհրդարանական դիվանագիտությանը:

Դեսպան Նաֆսիկա Նենսի Էվա Վրայլան նախագահ Սերժ Սարգսյանին է փոխանցել Հունաստանի նախագահ Պավլոպուլոսի ջերմ ողջույններն ու ՀՀ Նախագահի հրավերն ընդունելու եւ փոխադարձ այցով Հայաստան ժամանելու պատրաստակամությունը, ընդգծելով, որ Աթենքում հաճույքով են հիշում տարեսկզբին ՀՀ Նախագահի պաշտոնական այցը Հունաստան, որը նոր խթան հաղորդեց միջպետական հարաբերություններին:

Հանդիպմանն անդրադարձ է եղել երկկողմ եւ բազմակողմ ձեւաչափերով հայ-հունական փոխգործակցությունը զարգացնելու հնարավորություններին եւ առկա մեծ ներուժին:

Նյութի աղբյուր ՝ NEWS.am