Հոլոքոսթի զոհերի երեխաների մոտ «վիետնամական ախտանիշ» է հայտնաբերվել

Հետվնասվածքային ախտանիշը կարող է ժառանգական լինել: Նման եզրահանգման են եկել Մաունթ-Սինայի հիվանդանոցի Իկանա բժշկական դպրոցի աշխատակիցները: Նրանք հետազոտել են այն մարդկանց ԴՆԹ-ի մեթիլացման մակարդակը, ովքեր վերապրել են Հոլոքոսթը: Lenta-ի փոխանցմամբ՝ գիտնականների հետազոտության արդյունքները հրապարակվել են Biological Psychiatry ամսագրում:

Գենետիկայի մասնագետներն անալիզի են ենթարկել համակենտրոնացման ճամբարների 32 նախկին բանտարկյալների եւ նրանց մեծահասակ երեխաների (22 մարդ) արյան նմուշները: Փորձի վերահսկման խմբում են ընդգրկվել այն հրեաներն ու նրանց երեխաները, որոնց հաջողվել է հետապնդումներից խուսափել: Գիտնականներին հետաքրքրում էր սթրեսի ենթարկվելու հետ կապված FKBP5 գենի մեթիլացման մակարդակը, ավելի ճիշտ՝ ինտրոնոմ 7 կոչվող կոնկրետ հատվածը:

Մեթիլացումը գեների մոդիֆիկացիաների տեսակներից մեկն է, առանց դրանց նախնական կառուցվածքի փոփոխության՝ նուկլեոտիդների հերթագայություններ, որոնցից կազմված է ԴՆԹ-ն: Այսինքն՝ խոսքը ոչ թե մուտացիաների մասին է, այլ գենին որոշակի մոլեկուլի միացման, տվյալ դեպքում մեթիլային խմբին պատկանող: Սովորաբար դա հանգեցնում է գեների ակտիվության ճնշման: Մեթիլացումը կարեւոր նշանակություն ունի բջիջների նորմալ զարգացման համար, նաեւ նպաստում է քաղցկեղային ուռուցքների առաջացմանը:

Հաստատվել է, որ Հոլոքոսթը վերապրած մարդկանց մոտ մեթիլացման մակարդակը 10 տոկոսով բարձր է եղել՝ ի տարբերություն այն մարդկանց, որոնք ցեղասպանությանը չեն առնչվել: Եվ հակառակը՝ առաջինների սերունդների մոտ այն 7,7 տոկոսից ցածր է եղել՝ ի տարբերություն այն երեխաների, որոնց ծնողները չեն տառապել հետվնասվածքային ախտանիշով: Գիտնականների խոսքով՝ սա վկայում է այն մասին, որ սթրեսի հետեւանքները կարող են ոչ միայն պարզապես փոխանցվել հաջորդ սերունդներին, այլեւ նպաստել հոգեկան խանգարումների հանդեպ նրանց խոցելիությանը:

Հետվնասվածքային ախտանիշը (հայտնի է նաեւ որպես «վիետնամական ախտանիշ») ծանր վիճակ է, որ կարող է առաջանալ հոգեկան աշխարհը վնասող մեկ կամ մի քանի իրադարձություններ վերապրած մարդկանց մոտ: Այն բնութագրվում է սուր ապրումներով, անհանգստության բարձր մակարդակով եւ այլ ախտանշաններով: