Չեխիայի փոխվարչապետը ներողություն է խնդրել նախկին համակենտրոնացման ճամբարի գնչուների մասին արտահայտության համար

Չեխիայի փոխվարչապետ Անդրեյ Բաբիշը հանրապետական հեռուստատեսության եթերում ուրբաթ օրը ներողություն է խնդրել իր այն արտահայտության համար, թե Երկրորդ համաշխարհային պատերազմի տարիներին Հարավային Չեխիայում գտնվող գնչուների Լետի համակենտրոնացման ճամբար են աքսորվել աշխատել չցանկացողները, փոխանցում է «ՌԻԱ Նովոստի»-ն:

«Ես վատ եմ արտահայտվել: Եթե դրանով որեւէ մեկին վիրավորել եմ, ներողություն եմ խնդրում: Բայց ես ամենեւին այդպես չէի մտածում, դա ենթատեքստից դուրս է եղել»,- հայտարարել է Բաբիշը:

Ավելի վաղ Aktualne համացանցային պարբերականի լուսանկարիչը հայտնել էր, որ Վարնսդորֆ այցելած փոխվարչապետը հայտարարել է, որ գնչուների համար նախատեսված Լետի համակենտրոնացման ճամբարն իրականում այդպիսին չէր: «Դա աշխատանքային ճամբար էր: Ով չէր աշխատում, այնտեղ էր հայտնվում»,- ասել էր Բաբիշը:

Փոխվարչապետի արտահայտությունց հետո չեխ մի շարք քաղաքական գործիչներ նրա անհապաղ հրաժարականն են պահանջել: Մասնավորապես ընդդիմադիր ТОР 09  կուսակցության առաջնորդ Միրոսլավ Կալոուսեկը հայտարարել է, որ «եթե նրան (Բաբիշին) վարչապետը միչեւ երեքշաբթի չազատի, այդ հարցը պետք է խորհրդարանը լուծի»:

Դրա հետ մեկտեղ, վարչապետ Բոգուսլավ Սոբոտկան Բաբիշին խորհուրդ է տվել անձամբ այցելել Լետի՝ «պատմական փաստերի հետ» ծանոթանալու համար, թե «ինչպես են նացիստները եւ նրանց օժանդակողները տարբեր եղանակներով գնչուներին սպանել», որից հետո «ամոթի զգացումից դրդված ներողություն խնդրել եւ այլեւս այդպիսի հիմարություններ չտարածել»: