ԵՄ-ում պողպատի արտադրությունը հասել է պատմական նվազագույնի․ Financial Times

Եվրոպական միությունում (ԵՄ) պողպատի արտադրությունը հասել է պատմական նվազագույն ցուցանիշներին: Էներգակիրների բարձր գների, ամերիկյան մաքսատուրքերի և համաշխարհային շուկայում չինական ապրանքների ավելցուկի պատճառով Եվրամիությունից պողպատի արտահանումը նվազել է 20%-ով: Հոկտեմբերի 1-ին այս մասին հայտնել է Financial Times-ը (FT):

Պողպատարտադրողների եվրոպական ասոցիացիայի (EUROFER) տվյալներով՝ 2026 թվականի առաջին կիսամյակում դեպի ԱՄՆ եվրոպական մետաղի մատակարարումները նախորդ տարվա նույն ժամանակահատվածի համեմատ նվազել են 29%-ով: Սա տեղի է ունեցել Վաշինգտոնի կողմից ԵՄ-ից ներմուծման համար 50%-անոց մաքսատուրքեր սահմանելու ֆոնին: Դեպի Թուրքիա, Հնդկաստան և Չինաստան արտահանումը կրճատվել է առնվազն 18%-ով՝ ավելի էժան օտարերկրյա արտադրանքի հետ մրցակցության պատճառով:

2025 թվականին ԵՄ-ում չմշակված պողպատի արտադրությունը նվազել էր 3%-ով՝ հասնելով 126 մլն տոննայի, իսկ 2026 թվականի առաջին հինգ ամիսներին ցուցանիշը կրճատվել է ևս 1%-ով: Ընդ որում, EUROFER-ի ղեկավար Աքսել Էգերտը հայտարարել է, որ Եվրոպան մնում է պողպատաձուլական հզորությունները կրճատող միակ խոշոր տարածաշրջանը և այլևս չի վերադառնա 2015 թվականի արտադրության ռեկորդային ցուցանիշին՝ շուրջ 155 մլն տոննայի:

ԵՄ-ին բաժին է ընկնում պողպատի համաշխարհային արտադրության 14%-ը, մինչդեռ թողարկման գրեթե երեք քառորդն ապահովում է Ասիան: Այդուհանդերձ, Եվրամիությունը շարունակում է մնալ մետաղի խոշորագույն արտադրողներից մեկը աշխարհում: Ոլորտին աջակցելու նպատակով Եվրահանձնաժողովը հուլիսին սահմանել էր առևտրային քվոտաներ, ինչպես նաև պողպատը ներառել ածխածնային սահմանային ճշգրտման մեխանիզմում (CBAM), որը լրացուցիչ վճարներ է նախատեսում օտարերկրյա մատակարարների համար:

Այնուամենայնիվ, եվրոպացի արտադրողները շարունակում են բախվել բարձր ծախսերի: ArcelorMittal-ի եվրոպական ստորաբաժանման տնօրենների խորհրդի նախագահ Գերտ Վան Պուլվորդեի խոսքով՝ արտադրանքի ինքնարժեքը չափազանց բարձր է դառնում գնորդների, այդ թվում՝ ավտոարտադրողների համար: Նա ընդգծել է, որ արտահանումը դառնում է ծայրահեղ խնդրահարույց: