Ո՞րն է ամուսնության իդեալական տարիքը հայուհու համար

Ընկերներիցս մեկի աղջիկը 26 տարեկան է, եւ մայրը շատ է մտահոգվում, որ դուստրը դեռ չի ամուսնացել։ Նրա կարծիքով՝  աղջիկը «տունն է մնացել», եւ նրա ամուսնանալու շանսերը օրեցօր նվազում են։ Ընդ որում, աղջկա մասնագիտական հաջողությունները այնքան էլ չեն հետաքրքրում մայրիկին, քանի որ նա համոզված է, որ կնոջ գլխավոր հաջողությունն առաջին հերթին ամուսին եւ ընտանիք ունենալն է։ Ինչ-որ առումով նա ճիշտ է, բայց արժե՞ այդքան անհանգստանալ, չէ՞ որ աղջիկը ընդամենը 26 տարեկան է։ Իսկ ո՞ր տարիքում հայուհին պետք է ամուսնանա։ Մեր հասարակության մեծամասնությունը կարծում է, որ հայուհու համար ամուսնության իդեալական տարիքը 20-22-ն է։ Ավելին, նկատել եմ, որ վերջերս զույգերը վաղ են ամուսնանում (աղջիկը 18 տարեկան, տղան՝ 21)։ Կարծում եմ, որ ամուսնության հարցում պետք չէ շտապել։ Այս հարցում իմ ընկերները բաժանվում են երկու ճամբարի. ոմանք կարծում են, որ վաղ ամուսնանալը շատ ճիշտ է, իսկ մյուսները համոզված են, որ հասուն տարիքում զույգերն ավելի մեծ պատասխանատվությամբ են մոտենում ամուսնությանը։

Վաղ ամուսնությունների կողմնակիցները փաստում են, որ երիտասարդ զույգերն ավելի հեշտությամբ են հասկանում իրենց երեխաներին, նրանք ունեն ընդհանուր հետաքրքրություններ եւ դառնում են իրենց երեխայի ընկերը։ Նրանք եռանդով եւ էներգիայով լի են։ Եվ ինչպես կասեր իմ ծանոթներից մեկը՝ ծնողները երեխաների հետ են մեծանում։ Բայց մյուս կողմից երիտասարդ ամուսիններն, ըստ էության, իրենք են դեռ երեխա եւ չեն գիտակցում այդ մեծ պատասխանատվությունը, չեն գնահատում ընտանեկան արժեքները եւ կենսափորձ չունեն։ 20-ամյա տղան եւ աղջիկը նոր են սկսում ճանաչել աշխարհը, որը երբեմն լի է տհաճ անակնկալներով։ Ես կարծում եմ, որ տղամարդկանց արգելված է ամուսնանալ մինչեւ 30 տարեկան։ Նրանց պետք է ժամանակ տալ, որպեսզի ապրեն իրենց ազատ կյանքը, վայելեն բոլոր հաճույքները, «փորձեն» տարբեր կանանց եւ ամենակարեւորը՝ կայանան որպես տղամարդ։ Հենց այս ամենից հետո միայն տղամարդը կարող է ըստ արժանվույն գնահատել իր ապագա կնոջը, դառնալ լավ ամուսին եւ լավ հայր. չէ՞ որ տղաներն ավելի ուշ են հասունանում, քան աղջիկները։ Հավանաբար հանդիպել եք 40 տարեկան տղամարդկանց, որոնք իրենց էությամբ դեռ պատանի են...

Կարծում եմ, որ կնոջ համար ամուսնանալու իդեալական տարիքը 30 է, իսկ տղամարդու համար՝ 35-ը։ Բայց սա իմ սուբյեկտիվ կարծիքն է։ Կարծում եմ, որ հենց այս տարիքում զույգերը կարող են հասկանալ եւ գնահատել այն, ինչ ունեն։ 30-ամյա կինը անտեղի ժամանակ չի վատնի անհեթեթությունների վրա, քանի որ նա արդեն ավելի զուսպ է եւ իր կյանքի փորձի շնորհիվ կարող է փոխզիջման գնալ ոչ էական եւ սկզբունքային հարցերում։

Այո, տարիքը եւ փորձը մարդուն ավելի իմաստուն են դարձնում։ Հասուն տղամարդը կարող է հանգստացնել կնոջը մինչեւ նրա հիստերիկ տեսարան սկսելը։ Տարիքին զուգընթաց հասկանում ու զգում ես, թե որոնք են իսկական արժեքները, հասկանում «ընտանիք» եւ «հարազատ» բառերի իմաստի եւ նշանակության նրբությունները։ Այս տարիքում այլ կերպ ես երեխաներին դաստիրակում, քանի որ արդեն հասկանում ես այն, ինչ երիտասարդ տարիքում ի վիճակի չէիր գիտակցել, որովհետեւ ինտելեկտդ այդքան զարգացած չէր եւ փորձ չունեիր։

Մեզ՝ հայերիս մոտ, այս հարցում տարիքային խտրականություն կա։ Անհասկանալի պատճառներով մենք շտապում ենք մեզ դասել ծերացածների թվին։ Եվ սա այն պարագայում, երբ տարիքը ուղղակի պատրանք է։ Անգամ 80 տարեկանում կարելի է ընտանիք կազմել։ Թող որ այն ընդամենը երկու անդամ ունենա, բայց դա  ամբողջական ընտանիք կլինի։  

Իհարկե, տարիքը անհաջող ամուսնության դարման չէ, քանի որ սխալվել կարելի է եւ 20, եւ 35-40 տարեկանում՝ չնայած կենսափորձին եւ իմաստությանը։ Կարծում եմ, որ երջանիկ ամուսնության գաղտնիքը փոխզիջման գնալն է՝ թեկուզ ընդդիմանալով սեփական սկզբունքներին։

Յուլիա Վարդանյան

NEWS.am STYLE