Գալիք բաժանման 4 նախանշան

Հետազոտելով ամուսնական զույգերի կյանքը՝ ընտանեկան հոգեթերապևտ Ջոն Գոթմանը հայտնաբերել է գալիք բաժանման 4 նախանշան:

Ինչպիսի՞ անհամաձայնությունների մասին է խոսքը: Քննադատության, անարգանքի, պաշտպանության, նահանջի, հակամարտության մեջ չմտնելու ցանկության: Ամեն դեպքում այսպիսի խնդիրներ հանդիպում են գրեթե բոլոր հարաբերություններում, բայց, եթե ամուսինների միջև լինում են վերը նշվածներից մեկից ավելին, ապա արդեն կասկածներ են առաջանում այդ ամուսնության երկարատևության վերաբերյալ:

1. Ամուսիններից մեկի քննադատություն, այլ ոչ թե նրա պահվածքի

Քննադատություն, որը ենթադրում է, որ ինչ-որ բան այն չէ զույգերից մեկի մոտ: Դա կարող է լինել անձի կամ նրա բնավորության վրա հարձակում: Շատ հաճախ օգտագործվում են այնպիսի ընդհանրացումներ, ինչպիսիք են «դու միշտ…», «դու երբեք...», «դու այն մարդկանցից ես...», «ինչու ես դու այսպիսին...»: Սովորաբար քննադատվողը սկսում է պաշտպանվել, և արդյունքում զույգը դադարում է իրար լսել ու հետագա շփումը դառնում է անհնարին:

Ի՞նչ անել: Եթե քննադատել, ապա միայն կոնկրետ վարքը և ոչ թե անձն՝ ամբողջությամբ:

2. Արհամարհանքի դրսևորում

Խոսքը գնում է ոչ վերբալ նշանների մասին, որոնք ցույց են տալիս, որ զույգերից մեկը մյուսին համարում է իրենից ցածր: Դա կորող է լինել չար հումոր, սարկազմ, քմծիծաղ, այսինքն այն ամենը, ինչն ազդում է ինքնագնահատականի վրա: Այսպիսի քայլերի նպատակն է վիրավորել, նեղացնել: Կարելի է ասել, որ սա ամենալուրջ խնդիրն է նշված 4-ից:

Այս դեպքում ամուսինները պետք է աշխատեն իրենց վրա, և բացառեն այսպիսի դրսևորումներ, ստեղծելնփոխադարձ հարգանքի ու բարության մթնոլորտ:

3. Հարձակողական պաշտպանություն

Ամուսիններից մեկին թվում է, թե մյուսն անընդհատ քննադատում է իրեն, և նա փորձում է պաշտպանվել, կամ իրենից զոհ է սարքում ու սկսում արդարանալ: Խոսակցությունը շարունակվում է փոխադարձ մեղադրանքներ հնչեցնելով:

Այս պարագայում պետք է աջակցել ամուսնուն, հասկացնել, որ դուք համաձայն եք նրա ասածների առնվազն կեսի հետ, որ հասկանում եք նրա զգացմունքները և պատկերացնում, թե ինչ իրավիճակում է նա:

4. Ինքնաամփոփում, վեճից խուսափում

Որոշ ամուսիններ լռում են և զգուշություն ցուցաբերում, փորձում են խուսափել խոսակցությունից,  կամ հեռուստացույցի են նայում կամ համակարգչի էկրանին, դուրս են գալիս սենյակից, որպեսզի խուսափեն բարդ իրավիճակից: Որոշ դեպքերում դա հանգստանալու փորձ է, փրկություն բուռն զգացմունքների ժայթքումից: Սակայն, ի վերջո, կոնֆլիկտից խուսափել չի ստացվում: Չեզոքությունը մյուսի կողմից դիտվում է որպես սառնություն, շփման բացակայություն:

Պետք է ժամանակին նկատել, որ ձեր երկրորդ կեսը չի կարողանում հաղթահարել զգացմունքները և ընդմիջման կարիք ունի: Այդ պարագայում պետք է դադար տալ և խոսակցությունը սկսել, երբ բոլորը հանսգիստ են:

Աղբյուր՝ LADYNEWS.am